Issiqxonalarning havo sifatiga salbiy ta’siri bilan bog‘liq muammolarni uzil-kesil hal qilish vazifasi belgilandi
2025-07-30 17:00:00 / Yangiliklar
Ma’lumot uchun, bugungi kunda respublikada 5,1 ming gektar issiqxonalar faoliyat yuritmoqda. So‘nggi 7 yilda ularda yetishtiriladigan mahsulot hajmi 110 ming tonnadan 546 ming tonnaga ko‘paygan.
Yig‘ilishda sohada muammolar ham borligi, xususan, kredit og‘irligi, o‘g‘it narxi qimmatligi, uzluksiz gaz ta’minoti yo‘qligi, natijada 600 gektardan ortiq maydondagi issiqxona faoliyatini to‘xtatganligi va 128 gektari qarzdorlik sababli bank balansiga o‘tganligi qayd etildi.
O‘z navbatida endilikda issiqxona xo‘jaliklari faoliyati qo‘llab-quvvatlanishi ta’kidlandi. Xususan, ham ichki bozor, ham eksport uchun mahsulot yetishtiradigan, tabiiy gazda ishlayotgan issiqxonalarga qishki mavsumda gaz kafolatli hajmda beriladi, ko‘mir yoki boshqa muqobil isitish tizimida ishlayotgan hamda eksport majburiyatini olgan issiqxonalar ham tabiiy gazga qaytadi. Aylanma mablag‘ yetarli bo‘lishi uchun oldindan to‘lov oktabr-mart oylariga 50 foiz qilib belgilanadi, bunda issiqxonalar gaz korxonalari bilan 1-oktabrga qadar shartnoma imzolaydi.
Qolaversa, tabiiy gazdan ko‘mir yoki boshqa muqobil isitish tizimiga o‘tgan issiqxonalarga ajratilgan kredit muddati uzaytiriladi. Issiqlik nasoslari texnologiyalarida ishlaydigan issiqxona tashkil qilganlarga xarajatlarning 20 foizgacha qismi, bu ishlar kredit hisobidan bo‘lsa, kredit stavkasining 4 foizi qoplab beriladi.
Shu bilan birga, endilikda issiqxonalar, toifasidan qat’i nazar, yer solig‘ini qishloq xo‘jaligi yerlar stavkasida to‘laydi. 2028 yilga qadar issiqxona ishchilari uchun ijtimoiy soliq stavkasi 12 foizdan 1 foizga tushiriladi.
Shuningdek, Soliq qo‘mitasi tomonidan issiqxonalardan qisqartirilgan gaz qaysi sohalarga yo‘naltirilgani va ularning samaradorligi o‘rganiladi, agar gaz berilgan boshqa sohalarda qo‘shilgan qiymat kam bo‘lsa, gaz issiqxonalarga yo‘naltiriladi.
Ta’kidlash joizki, bugungi kunda Toshkent viloyatidagi issiqxonalar faoliyati havo sifatiga salbiy ta’sir ko‘rsatmoqda. Yig‘ilishda bu boradagi muammolarni uzil-kesil hal qilish vazifasi belgilandi.