O‘zbekiston Respublikasi Ekologiya va iqlim o‘zgarishi milliy qo‘mitasi

Eshituvda Qurilish va uy-joy kommunal xo‘jaligi vazirligi, Ekologiya vazirligi Toshkent viloyati boshqarmasi Quyi Chirchiq tuman bo‘limi, Sanitariya-epidemiologiya xizmati, "O‘zsuvta'minot" AJ, Quyi Chirchiq tumani hokimligi, Davlat ekologik ekspertizasi markazi vakillari hamda Surum mahalla fuqarolari ishtirok etdi.

Eshituvlar davomida “INDEX Consulting Company” MChJ mutaxassislari tomonidan loyiha haqida batafsil ma’lumot berildi. Loyihaga ko‘ra, Surum hududida zamonaviy kanalizatsiya tarmog‘i va oqova suv tozalash inshootlari barpo etilishi rejalashtirilgan. Ushbu inshootlar aholining sanitariya-gigiyena holatini yaxshilash, ekologik xavfsizlikni ta’minlash va chiqindi suvlarni standartlarga mos ravishda tozalashga xizmat qilishi kutilmoqda.

Texnik yechimlarga ko‘ra, tozalash inshooti zamonaviy texnologiyalar asosida quriladi va chiqindi suvlar ekologik me’yorlarga javob beradigan darajada tozalanadi. Quvurlar va infratuzilma elementlari esa xalqaro standartlarga mos ravishda loyihalashtirilgan. Loyihaning asosiy maqsadi – hududdagi kanalizatsiya tizimini takomillashtirish va tabiiy resurslarga salbiy ta’sirni kamaytirishdan iborat. Shuningdek, loyiha doirasida amalga oshiriladigan qurilish ishlari atrof-muhitga minimal darajada ta’sir ko‘rsatishini ta’minlash bo‘yicha kompleks choralar ko‘rilgani ta’kidlandi. 

Muhokama davomida mahalla fuqarolari tomonidan loyihaga nisbatan e’tirozlar bildirildi. Xususan, kanalizatsiya-tozalash inshootlari mahalla hududiga juda yaqin joylashganligi, bu esa kelgusida havoning ifloslanishi, yoqimsiz hidlarning tarqalishi, yerosti suvlarining ifloslanishi kabi ekologik muammolarga sabab bo‘lishi mumkinligi aytildi. Qolaversa, fuqarolar mazkur inshootlar qurilishi mahalladagi sanitariya holatiga salbiy ta’sir ko‘rsatishini, bu esa aholi salomatligiga xavf tug‘dirishini qayd etdilar.

Mahalla aholisi loyiha bo‘yicha yetarlicha ma’lumot berilmagani, qarorlar qabul qilish jarayonida ularning fikri e’tiborga olinmaganini ham tanqid ostiga oldilar.  Loyiha jamoatchilik tomonidan rad etildi va yanada chuqurroq o‘rganilib,  muqobil joylashuv variantlari ko‘rib chiqilishi lozimligi ta’kidlandi.