“Eng yaxshi pavilyon” nominatsiyasida vazirliklar o‘rtasida Iqtisodiyot va moliya vazirligining “Yashil moliya” mavzusiga bag‘ishlangan pavilyoni 1-o‘rinni egalladi. 2-o‘rin esa Suv xo‘jaligi vazirligining suv tejovchi texnologiyalar ekspozitsiyasi — mintaqadagi suv tanqisligi sharoitida dolzarb yechimlar taqdim etilgan pavilyoniga nasib etdi. 3-o‘ringa ikkita vazirlik Energetika va Transport vazirliklari pavilyoni munosib ko‘rildi. Bunda uglerod chiqindilarisiz infratuzilmani rivojlantirishga e’tibor qaratilgan. 

Ko‘rgazmada 20 dan ortiq xalqaro tashkilot va yetakchi kompaniyalar ham pavilyonlari bilan qatnashdi. Yakunda 1-o‘rin mintaqaviy tashabbuslar keng va mazmunli tarzda yoritilgan Qozog‘iston Respublikasi Ekologiya va tabiiy resurslar vazirligi pavilyoniga, 2-o‘rin qurg‘oqchil hududlarda innovatsion yechimlar taqdim etilgan Xalqaro biosho‘r qishloq xo‘jaligi markazi (ICBA) pavilyoniga hamda barqaror yer resurslaridan foydalanish bo‘yicha ilmiy ishlanmalari uchun Xitoyning Shinjon ekologiya va geografiya instituti pavilyoniga berildi. Xitoyning CAMCE kompaniyasi pavilyoni esa ilg‘or texnologiyalar va barqaror infratuzilma yondashuvi uchun 3-o‘rinni egalladi.

Hududlar bo‘yicha ham eng yaxshi pavilyonlar e’tirof etildi:

1-o‘rin — Qoraqalpog‘iston Respublikasi — Orolbo‘yi hududini ekologik reabilitatsiya qilish bo‘yicha keng qamrovli loyihalar uchun. 
2-o‘rin — Samarqand viloyati — chiqindilar bilan ishlash va ko‘kalamzorlashtirish sohasidagi samarali tajribalari uchun. 
3-o‘rin — Navoiy viloyati — sanoat sohasiga ekologik yechimlarni integratsiyalash borasidagi yondashuvi uchun.

Tizim tashkilotlari o‘rtasidagi  eng yaxshi pavilyonlar quyidagicha: 

1-o‘rin — Davlat ekologik ekspertizasi markazi;
2-o‘rin — Chiqindilarni boshqarish va sirkulyar iqtisodiyotni rivojlantirish agentligi;
2-o‘rin — O‘rmonlashtirish va yashil hududlarni kengaytirish, cho‘llanishga qarshi kurash agentligi
3-o‘rin — “Yashil loyiha” loyihalash instituti.

Mazkur pavilyonlarda ekologik ekspertiza, “yashil” investitsiyalar, chiqindilar bilan innovatsion ishlov berish va iqlim o‘zgarishiga moslashish borasidagi ilg‘or yondashuvlar namoyish etildi.

Bundan tashqari, ko‘rgazmada 122 nafar tadqiqotchining 52 ta innovatsion ekologik startap loyihalari ko‘rgazmasi tashkil etildi. Yakunda “Aral 1” va “Qishloq xo‘jaligida foydalanishga mo‘ljallangan kichik gibrid traktor” loyihasi asoschilari Sagdullayeva Kumara va Tlektesov Ernazar 1-o‘rinni qo‘lga kiritdi. 2-o‘rin Muqaddam Bekmuratovaning “EcoAsfalt” loyihasiga nasib etdi. 3-o‘ringa Asadbek Urunov “Suv tozalovchi kema” loyihasi uchun sazovor bo‘ldi. Loyihalarni qo‘llab-quvvatlash uchun 1-o‘ringa 500 million so‘m, 2-o‘ringa 300 million so‘m, 3-o‘ringa esa 200 million so‘m berildi. 

Qolaversa, hududlar va tizim tashkilotlari alohida nominatsiyalar bilan ham taqdirlandi. Jumladan, Andijon viloyati — “Ekologik ilhom pavilyoni”, Toshkent shahri — “Eng zamonaviy texnologiyalarga ega pavilyon”, Namangan viloyati — “Eng yashil pavilyon”, Farg‘ona viloyati — “Barqaror ishlab chiqarishning eng yaxshi namoyishi”, Jizzax viloyati — “Eng yaxshi ekologik dizayn pavilyoni”, Toshkent viloyati — “Eng yaxshi hamkorlik pavilyoni”, Surxondaryo viloyati — “Eng yaxshi ekoturistik yo‘nalish pavilyoni”, Xorazm viloyati — “Kelajak pavilyoni”,  Qashqadaryo viloyati — “Ijtimoiy ta’sir ko‘rsatgan pavilyon”, Sirdaryo viloyati — “Tabiat bilan uyg‘unlik pavilyoni” va Buxoro viloyati — “Madaniy ekologik uyg‘unlik pavilyoni” nominatsiyalari bilan taqdirlandi.
 
Tizim tashkilotlaridan esa Turizm qo‘mitasi va Ekoturizm departamenti — “Eng interaktiv pavilyon”, 
 Muhofaza etiladigan tabiiy hududlar departamenti — “Bioxilma-xillikni aks ettirgan pavilyon”, Gidrometerologiya agentligi — “Eng xalqchil pavilon” va Markaziy Osiyo atrof-muhit va iqlim o‘zgarishini o‘rganish universiteti (“Green University”) — “Eng innovatsion pavilyon” deb topildi.

Ko‘rgazma doirasidagi barcha startaplar, loyihalar va tashabbuslar ekologik vaziyatni yaxshilashga, atrof-muhit muhofazasi borasida samarali yechimlar ishlab chiqishga xizmat qiladi.