O‘zbekiston Respublikasi Ekologiya va iqlim o‘zgarishi milliy qo‘mitasi

“Tanlov doirasida yoshlarimizning ekologiya, atrof-muhitni muhofaza qilish, iqlim o‘zgarishi, suv tanqisligi, bioxilma-xillikni saqlash, umuman, dolzarb ekologik muammolar borasidagi bilimlari sinovdan o‘tkazildi, – dedi Ekologiya vazirligi bo‘lim boshlig‘i Zarrina Abdullayeva. – Quvonarlisi, har bir yosh avlod bu borada yetarlicha bilimga, ko’nikmaga ega. Tanlov davomida biz qiyin deb hisoblagan savollarga ham juda yaxshi javob berishdi, ekologik muammolarga yechim sifatida bir qancha muhim takliflarni ilgari surishdi”.

Birinchi shartda jamoalar o‘z hududlaridagi ekologik muammolarni hal qilish borasida olib borayotgan faoliyatlari bilan tanishtirishdi. Ikkinchi shartda esa yurtimiz va mintaqa uchun dolzarb hisoblangan iqlim o‘zgarishi, atrof-muhitning chiqindilar bilan ifloslanishi, suv tanqisligi, global isish, ozon tuynugi yemirilishi va boshqa muammolarni  qamrab olgan savollarga javob berishdi va mazkur muammolar borasida o’z yechim va takliflarini bildirishdi.

Tanlovning uchinchi shartida har bir jamoa chiqindilardan tayyorlangan foydali buyumlarini taqdim etishdi. Ayniqsa, Xorazm viloyati jamoasining eko-favvorasi, Qoraqalpog‘iston Respublikasining shina va boshqa narsalardan tayyorlagan buyumi, sellofan paketlardan tayyorlangan bejirim liboslar, Namangan viloyatining bolalar uchun tayyorlagan o‘yinchoqlari ishtirokchilarda iliq taassurot qoldirdi.

To‘rtinchi shartda jamoalar o’z Kengashlari faoliyati aks etgan kliplarini namoyish qilishdi. 

Yakunda Samarqand viloyati birinchi o‘rinni, Xorazm viloyati ikkinchi o‘rinni, Qoraqalpog‘iston Respublikasi va Farg‘ona viloyatlari esa uchinchi o‘rinni egallashdi.

“Biz uchun eng muhimi yangi ma'lumotlarga ega bo‘lganimiz, bilimlarini yanada mustahkamlaganimizdir. Tanlov davomida boshqa jamoalardan bilmagan narsalarimizni o‘rgandik, tajriba almashdik, respublikamizning boshqa hududlaridagi ekologik vaziyatlardan xabardor bo‘ldik. Eng muhimi, nafaqat o‘z hududimiz, balki butun mintaqani tashvishga solayotgan ekologik muammolarni hal qilish uchun nimalar qilish kerakligi borasidagi rejalarimizni belgilab oldik”, – dedi Samarqand viloyati ishtirokchisi, viloyat Yosh ekologlar harakati Kengashi raisi Feruzjon Toshpo‘latov.

Bu kabu tanlovlar ishtirokchilarning ekologik ongi va madaniyatini yanada yuksaltirish, bioxilma-xillikni asrash, tabiiy resurslarni tejash, atmosfera havosi ifloslanishining oldini olish, chiqindilarni saralash va boshqa ekologik masalalar borasida xabardorligini oshirishga xizmat qiladi.

 “Eko-oromgoh–2025” davom etmoqda.