O‘zbekiston Respublikasi Ekologiya va iqlim o‘zgarishi milliy qo‘mitasi

Yoshlarning ekologik madaniyatini yuksaltirish va huquqbuzarliklarga qarshi kurash masalalariga e'tibor qaratildi

27-may kuni Toshkent viloyati Bo‘stonliq tumanida "Eko-oromgoh–2025" doirasida yoshlarning ekologik madaniyatini yanada yuksaltirish, ularning ekologik bilimi va mas’uliyatini oshirishga bag‘ishlangan seminar bo‘lib o‘tdi. Unda Ekologiya, atrof-muhitni muhofaza qilish va iqlim o‘zgarishi vazirligi mas'ullari hamda respublikamizning barcha hududlaridan tashrif buyurgan ishtirokchilar qatnashdi.

Ma’lumot uchun, joriy yilning 15-may kuni O‘zbekiston Respublikasi Prezidentining “2030-yilgacha bo‘lgan davrda aholining ekologik madaniyatini yuksaltirish konsepsiyasini tasdiqlash to‘g‘risida”gi 181-sonli qarori qabul qilindi. Mazkur qaror 2030-yilgacha MTM tarbiyalanuvchilari, o‘quvchilar va talabalar, davlat tashkilotlari xodimlarining ekologik bilimi, madaniyati va mas'uliyatini yanada oshirish, aholining ekologik madaniyatini yuksaltirish, bu borada bir qator targ‘ibot ishlari va samarali chora-tadbirlarni amalga oshirishni ko‘zda tutadi.

Seminarda nutq so‘zlagan Ekologiya vazirligi bosh mutaxassisi Murod Nurmatov ekologik turizmga to‘xtalib, bu borada atrof-muhitga ehtiyotkorona munosabatda bo‘lish lozimligini ta'kidladi.

"Afsuski, bugungi kunda ko‘pchilik o‘zi dam olgan hududni turli chiqindilar bilan ifloslantirib ketadi. Shuningdek, o‘sha hududdagi Qizil kitobga kiritilgan noyob o‘simliklar va hayvonlarga ham shikast yetkazishadi. Bu tabiatga katta zarar yetkazilishiga sabab bo‘ladi. Shuning uchun tabiat qo‘yniga dam olishga chiqqaningizda, albatta, atrof-muhitni ifloslantirmang va tabiatga zarar yetkazmang", – dedi Murod Nurmatov.

Ekologiya vazirligi bo‘lim boshlig‘i Nodir Jamburbayev esa ekologik huquqbuzarliklar va ularga nisbatan ko‘riladigan choralar haqida ma'lumot berib o‘tdi.

"Suv havzalarida noqonuniy qum-shag‘al qazib olish, daraxtlarga, o‘simliklarga shikast yetkazish, tegishli ruxsatnomalarsiz ov qilish, moratoriy davrida baliq ovlash yoki umuman ov bilan shug‘ullanish, belgilanmagan joylarga chiqindi tashlash, atmosfera havosini, suvni ifloslantirish va shu kabi atrof-muhitga zarar yetkazilishiga sabab bo‘ladigan holatlar qonunga ko‘ra ma'muriy yoki jinoiy javobgarlikka sabab bo‘ladi. Qizil kitobga kiritilgan hayvonlar yoki o‘simliklarga shikast yetkazganlar esa yanada kattaroq javobgarlikka tortiladi", – dedi u. 

Mutaxassis, shuningdek, Ekologiya vazirligi davlat nazorat inspeksiyasi tomonidan ekologik huquqbuzarliklarning oldini olish maqsadida doimiy nazorat reyd tadbirlari olib borilayotganligi, bu borada jamoatchilik nazorati ham yo‘lga qo‘yilganligini qayd etdi.

"Har qanday turdagi ekologik huquqbuzarliklarga guvoh bo‘lsangiz, albatta, bu haqda Ekologiya vazirligining (71) 207-11-07, (71) 207-11-08, 1157 va 1207 telefon raqamlariga qo‘ng‘iroq qilib xabar bering. Shuningdek, murojaatlaringizni @ecogovuz_bot orqali matn, surat va video shaklida ham yuborishingiz mumkin", – dedi mutaxassis.

Seminar davomida har bir hududdan ishtirokchilar so‘zga chiqib, o‘zlari yashaydigan joylardagi ekologik muammolarga to‘xtalib o‘tishdi va yechim taklif qilishdi. Xususan, Buxoro viloyati ishtirokchisi hududdagi cho‘llanish muammosi va bu borada ko‘proq saksovul kabi cho‘lga chidamli o‘simliklar ekishni ko‘paytirish lozimligini aytib o‘tdi. 

Seminar davomida ishtirokchilar o‘zlarini qiziqtirgan savollarga javob olishdi.

Ma'lumot uchun, 26-may kuni "Eko-oromgoh–2025" tadbiri ochilish marosimi bo‘lib o‘tdi. Oromgohda 1-iyunga qadar turli seminarlar, intellektual o‘yinlar, ommaviy sport va plogging musobaqalari, ekologik loyihalar, “Ekologiya bilimdonlari” va boshqa tanlovlar, madaniy-koʻngilochar tadbirlar, taniqli insonlar bilan uchrashuvlar va tarixiy obidalarga sayohatlar kutmoqda.