“Orolbo’yi”da noyob oq dumli suvburgut ko‘payishda davom etmoqda
2025-05-08 11:00:00 / Yangiliklar
Ekologiya, atrof-muhitni muhofaza qilish va iqlim o‘zgarishi vazirligi tasarrufidagi “Orolbo‘yi” milliy tabiat bog‘i xodimlari tomonidan bolalagan oq dumli suvburgut tasvirga olindi.
Oq dumli suvburgut zaif, tabiatan kamyob, uchib o‘tuvchi nominal kenja tur sifatida O‘zbekiston Qizil kitobi, Tabiatni muhofaza qilish xalqaro ittifoqining Qizil ro‘yxati, shuningdek, CITESning I Ilovasi hamda Bonn konvensiyasining I Ilovasiga kiritilgan.
Bu qushning soni doimo kam bo‘lgan va oxirgi yillarda ko‘paygan. Jami soni taxminan 10 mingta atrofida. 2000-yil boshlarida Ustyurt tekisligida va oradan 17 yil o‘tib “Sudochye” ko’llarida uyasi topilgan.
Ma’lumot uchun, “Orolbo’yi” milliy tabiat bog’i 2019-yil 23-avgustda Qoraqalpog’iston Respublikasi Bo’zatov tumanida tashkil etilgan. Hududda 150 tur hayvonot dunyosi uchraydi, shundan 17 turi O’zbekiston Qizil kitobiga kiritilgan.