O‘zbekiston Respublikasi Ekologiya va iqlim o‘zgarishi milliy qo‘mitasi

Ko‘rsatuv 4–5-aprel kunlari yurtimizda bo‘lib o‘tgan Samarqand Iqlim Forumiga bag‘ishlandi. Unda forumdan ko‘zlangan maqsad, asosiy masalalar, erishilgan natijalar va iqlim o‘zgarishiga qarshi kurashishda Markaziy Osiyo davlatlarining o‘zaro hamkorligi muhokama qilindi.

Ma'lumot uchun, mazkur forum Markaziy Osiyo tarixidagi iqlim masalasiga bagʻishlangan ilk tarixiy voqelikka aylandi. Birlashgan Millatlar Tashkiloti Bosh kotibining uch nafar oʻrinbosari, BMTning ekologiya yoʻnalishidagi tashkilotlari, konvensiyalari rahbarlari, bir qancha davlatlar, xalqaro tashkilotlar va agentliklarning (UNCCD, FAO, UNIDO, UNECE, ICBA va hokazo) 30 dan ortiq ekologiya sohasiga masʼul vazirlari, yetakchilari hamda boshqa koʻplab xorijlik mutaxassislarning ishtiroki Forumning nufuzini yanada oshirdi.

Dastur davomida Iqlim Forumida Davlat rahbari tomonidan muhim tashabbuslar ilgari surilganligi qayd etildi. Xususan, "Markaziy Osiyoning yashil belbog‘i" mintaqaviy daraxt ekish aksiyasini o‘tkazish, qayta tiklanuvchi energiya manbalari ulushini oshirish, suv resurslaridan oqilona foydalanish kabi tashabbuslar iqlim o‘zgarishlarining salbiy oqibatlarini yumshatishga, dolzarb ekologik muammolarga yechim topishga xizmat qiladi. 

Ma'lumot uchun, kelgusi 5 yilda qayta tiklanuvchi energiya manbalari ulushini 54 foizga yetkazish rejalashtirilgan boʻlib, bu issiqxona gazlari chiqindilari hajmini qariyb 16 million tonnaga kamaytirish imkonini beradi.

Ko‘rsatuv davomida Iqlim Forumi yuqori darajada tashkil etilganligi va unda bir qancha samarali natijalarga erishilgani qayd etildi. Xususan, Forum natijasida O‘zbekiston Parij kelishuvini amalga oshirishni qoʻllab-quvvatlash va global sof "nol chiqindi"ga erishishga qaratilgan, 43 davlatdan iborat "Climate Club" koalitsiyasiga a'zo bo‘ldi. Shuningdek, Germaniya xalqaro hamkorlik jamiyati (GIZ), Qirgʻiz Respublikasi Tabiiy resurslar, ekologiya va texnik nazorat vazirligi va BMT Bolalar jamgʻarmasining (UNICEF) Oʻzbekistondagi vakolatxonasi bilan o‘zaro hamkorlikni yanada mustahkamlashga qaratilgan Memorandumlar imzolandi. Qolaversa, Jahon banki bilan “Oʻzbekistonda barqaror landshaftlarni tiklash” loyihasi boshlangani eʼlon qilindi.

Samarqand Iqlim Forumi — nafaqat Markaziy Osiyo mintaqasi, balki butun dunyoda dolzarb masalaga aylangan iqlim muammolarini samarali hal qilish, bu boradagi o‘zaro kuchlarni birlashtirish va kelajakda amalga oshirilishi zarur bo‘lgan chora-tadbirlarni belgilab olish uchun muhim platformaga aylandi. Forum davomida ko‘tarilgan masalalar, bildirilgan dolzarb fikr-mulohazalar va erishilgan natijalar samara berishi shubhasiz.