O‘zbekiston Respublikasi Ekologiya va iqlim o‘zgarishi milliy qo‘mitasi

Forumda Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov, Bosh prokuror o‘rinbosari Sherzod To‘xtaboyev, O‘rmon xo‘jaligi agentligi direktori Erkin Muhiddinov, Oliy Majlis Qonunchilik palatasi Ekologiya va atrof-muhitni muhofaza qilish masalalari qo‘mitasi raisi Xayrullo Gapporov, soha xodimlari, xalqaro ekspertlar va ommaviy axborot vositalari vakillari ishtirok etdi. 
Tadbirni ochib bergan Ekologiya vaziri Aziz Abduhakimov o‘rmonlarning ahamiyati va yurtimizda o‘rmonzorlar barpo etish, yashillik darajasini oshirish borasida amalga oshirilayotgan ishlarga to‘xtalib o‘tdi. Shuningdek, o‘rmon hududlarini kengaytirish va ularni qayta tiklash har qachongidan ham muhim ekanligini ta’kidladi. 

“O‘rmonlar ekologik xavfsizlikni ta’minlash, barqarorlikni asrash, biologik xilma-xillikni muhofaza qilishda muhim ahamiyat kasb etadi. Shuningdek, iqlim o‘zgarishini yumshatish, havo va suvimizni tozalash, butun dunyo bo‘ylab millionlab insonlarning turmush tarzini yaxshilashda ham katta rol o‘ynaydi, — dedi A.Abduhakimov. — Afsuski, bugungi kunda dunyo miqyosida o‘rmonlar hududi kamayib bormoqda, natijada ekologik vaziyat yomonlashmoqda. Bu esa insoniyatni mavjud o‘rmonlarni saqlab qolish, yashillik darajasini oshirish haqida chuqurroq mulohaza yuritish va bu borada birlashishga undaydi. Shunday ekan, o‘rmonlarni muhofaza qilish doimiy vazifamiz bo‘lib qolishini aslo unutmasligimiz kerak”.

Vazir, shuningdek, o‘rmon xo‘jaligi sohasida mehnat qilib kelayotgan xodimlarning mehnatlarini alohida e’tirof etib, ularni ushbu sana bilan samimiy tabrikladi va kelgusidagi faoliyatlariga muvaffaqiyatlar tiladi. 

Tadbirda so’zga chiqqan Bosh prokuror o‘rinbosari Sherzod To‘xtaboyev ham soha fidoiylarini bayram bilan tabriklab, mehnat faoliyatlarida yuksak muvaffaqiyatlar tiladi. Shu bilan birga, atrof-muhitni muhofaza qilish borasidagi hamkorlik yanada samarali bo’lishiga ishonch bildirdi.

O‘rmon xo‘jaligi agentligi direktori Erkin Muhitdinov esa amalga oshirilayotgan ishlar, xususan, cho‘llanishning oldini olish, himoya o‘rmonzorlari barpo etishda soha xodimlarining xizmatlari katta ekanligini qayd etdi. Shundan so‘ng sohada uzoq yillardan buyon samarali faoliyat yuritib kelayotgan bir guruh xodimlar “O‘rmon fidoyisi” ko‘krak nishoni bilan taqdirlandi.   

Shuningdek, forumda o‘rmonchilar tomonidan yetishtirilayotgan dorivor va boshqa mahsulotlar ko‘rgazmalari, daraxtlarni asrashga qaratilgan “Ota ekkan daraxt” spektakli taqdim etildi. Forum yakunida mehmonlar uchun “Green University” hududi bo‘ylab ekskursiya uyushtirildi.

Ma’lumot uchun, o‘rmon fondi yerlarining umumiy maydoni 12 mln 100 ming gektar bo‘lib, respublika umumiy yer maydonining 26 foizini tashkil etadi. O‘rmon fondi yerlarining 10 mln 200 ming gektari (84 foiz) cho‘l, 1 mln 640 ming gektari (13 foiz) tog‘, 260 ming gektari (3 foiz) to‘qay va vodiy hududlaridan iborat. 

2024-yilda respublikada o‘rmon bilan qoplangan maydonlar 3650 ming gektarga va o‘rmon bilan qoplanganlik darajasi 8,1 foizga yetkazildi. Respublikada ekologik vaziyatni barqarorlashtirish maqsadida 220 ming gektar maydonlarda o‘rmonlar barpo qilindi va qayta tiklandi. Jumladan, Orol dengizi tubi va Orolbo‘yi hududlarida qum ko‘chishi hamda atmosfera havosiga tuz-chang ko‘tarilishini bartaraf etish maqsadida jami 215 ming gektar, shundan, Qoraqalpog‘iston Respublikasi Mo‘ynoq tumanida 112 ming 500 gektar, Buxoro viloyati Olot tumanida 41 ming gektar, Navoiy viloyati Tomdi, Uchquduq tumanlarida 51 ming 300 gektar va Xorazm viloyati Tuproqqal'a tumanida 10 ming gektar maydonda “yashil qoplamalar” yaratildi.

Bundan tashqari, barcha o‘rmon xo‘jaliklarida tuproq-iqlim sharoitlarga mos bo‘lgan ko‘chat yetishtirish bo‘yicha 1300 gektar maydonda niholxona-ko‘chatxonalar tashkil etilib, 127 mln tup nihol-ko‘chatlar yetishtirish yo‘lga qo‘yildi. Qolaversa, respublikaning cho‘l, tog‘oldi hududlarida eroziya va yerlar degradatsiyasining oldini olishga qaratilgan 2 500 gektar maydonda himoya o‘rmonzorlari, 134 ta shahar va tumanlarda 347 gektar maydonda “yashil bog‘lar” barpo etildi.