O‘zbekiston shaharlarida havo sifatini yaxshilash bo‘yicha chora-tadbirlar taklif etilmoqda
2025-03-14 09:00:00 / Yangiliklar
Unda Ekologiya vazirligi, Gidrometeorologiya xizmati agentligi, Sogʻliqni saqlash vazirligi, “Zamin” xalqaro jamoat fondi, UNEP, Birlashgan Millatlar Tashkilotining Yevropa Iqtisodiy Komissiyasi (YeIK), Jahon sogʻliqni saqlash tashkiloti (JSST), ekologlar va boshqa manfaatdor tomonlar vakillari ishtirok etdi.
Videokonferensiya davomida havo sifati, iqlim o‘zgarishi va ekologik barqarorlik masalalari global ahamiyat kasb etayotgani ta’kidlandi. Mayda dispers zarrachalarning (PM2.5 va PM10) yuqori konsentratsiyasi, transport tashlamalarining ko'payishi va transchegaraviy ifloslanish ekologik vaziyatni, ayniqsa, sanoat jadal rivojlanayotgan qurg'oqchil hududlarda yomonlashtiradi.
Ekologiya vazirligining Atmosfera havosi muhofazasini ta’minlash bo‘limi boshlig‘i Gulnora Xojabekova Termiz shahrining geografik va iqlim xususiyatlari ifloslantiruvchi moddalarning to‘planishiga xizmat qilayotgani, shu bois O‘zbekistonda tashlamalarni monitoring qilish va tartibga solish sohasida faol islohotlar olib borilayotganini ta’kidladi.
“Loyiha avtomatlashtirilgan stansiyalar, sunʼiy yoʻldosh maʼlumotlari va mobil laboratoriyalar yordamida zamonaviy monitoring usullarini joriy etish, iqlim omillarini, jumladan, chang boʻronlari va mavsumiy shamol oʻzgarishlarining taʼsirini tahlil qilish, havo sifatini samarali boshqarish va salbiy oqibatlarning oldini olish imkonini beruvchi ifloslanishni oldindan bashorat qilish modellarini joriy etishni nazarda tutadi. Sanoat va transport tarmoqlari uchun ham tashlamalarni kamaytirish bo‘yicha tavsiyalar ishlab chiqilib, ifloslanishning aholi salomatligiga ta’siri baholanmoqda”, — dedi G.Xojabekova.
Bundan tashqari, konferensiya tashkilotchilari tomonidan O‘zbekiston shaharlarida havo sifatini yaxshilash bo‘yicha qo‘shimcha chora-tadbirlar, jumladan, issiqlik va energiya ta’minotida mazutdan bosqichma-bosqich voz kechish, yuk transporti harakatini cheklash, sun’iy suv havzalari va irrigatsiya tizimlarini yaratish, obodonlashtirishni kengaytirish, qurilish jarayonida shamol oqimi va chang hosil bo‘lishini hisobga olish, havo monitoringi tizimini takomillashtirish taklif etildi.
Tadbir yakunida ishtirokchilar mintaqaviy hamkorlik va O‘zbekistonda havo sifatini yaxshilash bo‘yicha sa’y-harakatlarni muvofiqlashtirish muhimligini ta’kidladilar.