O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi

Shuningdek, ekologik ekspertiza tegishli faoliyatning ekologik talablarga muvofiqligini belgilash, ekologik xavflilik darajasini aniqlash, salbiy ta’sirining oldini olish, uni kamaytirish hamda atrof-muhitni muhofaza qilish va tabiiy resurslardan oqilona foydalanish bo‘yicha nazarda tutilayotgan chora-tadbirlarning yetarliligini hamda asosliligini aniqlash maqsadida o’tkaziladi. Bunda qonuniylik, xolislik, jamoatchilik ishtiroki, ochiqlik va oshkoralik tamoyillariga amal qilinadi.

Ekologik ekspertiza obyektlari quyidagilardan iborat va ular davlat ekologik ekspertizasidan o‘tkazilishi shart:

— barcha turdagi qurilishlar uchun yer uchastkalarini tanlash va ajratish materiallari;

— loyihaoldi va loyiha hujjatlari;

— tabiiy resurslardan foydalanish bilan bog‘liq bo‘lgan xo‘jalik faoliyatini hamda boshqa faoliyatni tartibga soluvchi normativ-texnik va yo‘riqnoma-uslubiy hujjatlar, shu jumladan, texnik reglamentlar va shartlarning, standartlarning, qoidalar hamda yo‘riqnomalarning loyihalari;

— chiqindilarni zararsizlantirish, qayta ishlash va utilizatsiya qilish uchun yangi turdagi texnologiyalarni hamda texnika vositalarini, materiallar, buyumlarni, biologik, kimyoviy moddalarni va vositalarni yaratish bo‘yicha hujjatlar;

— atrof-muhit holatiga va inson sog‘lig‘iga salbiy ta’sir ko‘rsatuvchi ishlab turgan korxonalar hamda boshqa obyektlar;

— maxsus huquqiy rejimga ega bo‘lgan obyektlar.

Davlat ekologik ekspertizasini o‘tkazishda quyidagilar amalga oshiriladi:

— taqdim etilgan materiallarning atrof-muhitni muhofaza qilish va tabiiy resurslardan oqilona foydalanish sohasidagi qonunchilik talablariga muvofiqligi tekshiriladi;

— faoliyatning ekologik va ijtimoiy oqibatlari to‘g‘risidagi ma’lumotlarning ishonchliligi va to‘liqligi tahlil qilinadi;

— biologik, kimyoviy moddalar va texnologiyalarning atrof tabiiy muhitga ta’sirini baholashning asosliligi tekshiriladi;

— tegishli faoliyatni amalga oshirish oqibatlari bilan bog‘liq ekologik xavflilik darajasini baholashning to‘g‘riligi tekshiriladi;

— ekologik xavfsizlik talablarini ta’minlashga doir chora-tadbirlarning yetarliligi va asosliligi aniqlanadi;

— ekologik normativlar loyihalarining asosliligi tekshiriladi.

Ta’kidlash joizki,agar hujjatlar atrof-muhitni muhofaza qilish va tabiiy resurslardan oqilona foydalanish sohasidagi qonunchilik talablariga zid bo‘lsa, ma’lumotlar noto‘g‘ri va (yoki) buzib ko‘rsatilsa,  jamoatchilik eshituvlarida asosli e’tirozlar bildirilgan bo‘lsa, obyektni ekologik ekspertizadan o’tkazish rad etiladi.

Muhim! 

Davlat ekologik ekspertizasining ijobiy xulosasi bo‘lmay turib, loyihalarning bank va boshqa kredit tashkilotlari tomonidan moliyalashtirilishi taqiqlanadi. Shuningdek, buyurtmachi (tashabbuskor) xulosadagi mavjud takliflarga muvofiq loyihaning qonunchilik talablariga muvofiqlashtirilishini ta’minlashi hamda materiallarni davlat ekologik ekspertizasi uchun qayta taqdim etishi yoxud tegishli faoliyatdan voz kechishi shart.

Fakt! 

Davlat ekologik ekspertizasi xulosasi atrof-muhitga ta’sirni baholash materiallari bo‘yicha xulosa berilgan kundan e’tiboran 3 yil mobaynida, ekologik normativlar loyihalari bo‘yicha esa xulosa berilgan kundan e’tiboran 5 yil mobaynida yuridik kuchga ega bo‘ladi.

Ekologik ekspertiza xulosasi buyurtmachi (tashabbuskor) ariza bilan murojaat qilganda, faoliyati to‘xtatib turilganda, ekspertiza xulosasida ko‘rsatilgan talablarga rioya etilmaganda va qonunchilikda belgilangan boshqa hollarda tugatiladi.