O‘zbekiston Respublikasi Ekologiya va iqlim o‘zgarishi milliy qo‘mitasi

Tadbirda vazirlik xodimlari, Qurolli Kuchlar akademiyasining professor va katta o‘qituvchilari hamda O‘zbekiston Yozuvchilar uyushmasi vakillari ishtirok etdi. 

Tadbirda O‘zbekiston Respublikasi Prezidenti, Qurolli Kuchlar Oliy Bosh Qo‘mondoni Shavkat Mirziyoyev tashabbusi bilan so‘nggi yillarda olib borilayotgan keng ko‘lamli islohotlar natijasida milliy armiyamizning qiyofasi va salohiyati tubdan o‘zgargani ta'kidlandi. 

"Qurolli Kuchlarimiz tashkiliy va tarkibiy jihatdan takomillashdi. Tuzilmalarning harakatchanligi, jangovar qobiliyati, harbiylarning jismoniy va ma’naviy-ma’rifiy tayyorgarligi oshdi. Qism va bo‘linmalar zamonaviy qurol-yarog‘ va jangovar texnika bilan ta’minlandi, — dedi Ekologiya vaziri maslahatchisi Matnazar Elmurodov. — Shuningdek, Prezident tashabbusi Qurolli Kuchlar akademiyasi isloh qilinib, kelgusida uning harbiy ilm-fan sohasi lokomotiviga aylanishi uchun mustahkam zamin yaratildi. Endilikda oliy harbiy ta’lim muassasalarida ham yangicha yondashuv va o‘quv uslublari joriy etishga asosiy e’tibor qaratilmoqda".

Tadbir davomida bugungi kunda jahondagi va mintaqadagi harbiy siyosiy vaziyat Qurolli Kuchlarimiz salohiyatini har tomonlama yuksaltirish, davlat organlari barcha subyektlarining favqulodda vaziyatlar oqibatlarini bartaraf etish bo‘yicha tayyorgarlik darajasini kuchaytirishni taqozo etayotganiga ham e'tibor qaratildi. 

"Vatanimiz mustaqilligi natijasida bugungi kunda aholi tinch-totuv yashamoqda. Mamlakatimiz o‘zining kuchli armiyasiga ega, Vatan himoyachilari chegara sarhadlarida xizmat qilib, yurt farovonligini ta'minlamoqda, — dedi Qurolli Kuchlar akademiyasi katta o‘qituvchisi Adham Nurillayev. — Xalqimizning farovon hayotini  himoya qilish asosiy burchimiz va bunga doim tayyormiz". 

O‘z navbatida yurt tinchligi atrof-muhitni muhofaza qilish, ekologik dolzarb masalalarga ijobiy yechim topishda muhim ahamiyat kasb etishi qayd etildi. Shuningdek, O‘zbekiston Yozuvchilar uyushmasi a’zosi Zamira Ro‘ziyeva Vatan himoyachilariga bag‘ishlangan she’rlaridan o‘qidi.

Ma'lumot uchun, “O‘zbekiston – 2030” strategiyasida mamlakatimiz xavfsizligi va mudofaa salohiyatini kuchaytirish, jahonda sodir bo‘layotgan murakkab global jarayonlarni inobatga olgan holda Qurolli Kuchlarning qudrati, mamlakatimizning mudofaa qobiliyati va harbiy salohiyatini yanada oshirish bo‘yicha bir qator islohotlar belgilangan.