Mazkur qonun loyihasi Oʼzbekiston Respublikasi Prezidentining 2021-yil 30-dekabrdagi “Аtrof-muhitni muhofaza qilish hamda ekologik nazorat sohasidagi davlat organlari faloiyatini tashkil etish chora-tadbirlari konsepsiyasini tasdiqlash toʼgʼrisida”gi 76-son qaroriga asosan ishlab chiqilgan. Unga koʼra, ekologiya va atrof-muhitni muhofaza qilish tizimlarida samarali mehnat qilib, ijobiy natijalarga erishgan xodimlarni rag‘batlantirish, ekologik faollar safini yanada kengaytirish, shuningdek, atrof-muhitni muhofaza qilishda jamoatchilik ishtirokini qo‘llab-quvvatlash maqsadida “Oʼzbekiston Respublikasida xizmat koʼrsatgan ekolog” faxriy unvoni taʼsis etiladi.

Mazkur unvon bilan mamlakatimizda ekologiya va atrof-muhitni muhofaza qilish sohasini rivojlantirish, iqlim oʼzgarishi oqibatlarini yumshatish, tabiiy resurslardan oqilona foydalanish va ularni qayta tiklash borasida salmoqli natijalarga erishgan, shuningdek, yashil hududlarni kengaytirish va koʼkalamzorlashtirish ishlarida alohida tashabbus koʼrsatgan, aholining ekologik madaniyatini oshirish, yosh avlodni tabiatga hurmat ruhida tarbiyalash hamda tizimda yuqori malakali kadrlarni tayyorlash borasida fidokorona mehnat qilayotgan mutaxassis-xodimlar va soha vakillari, shuningdek, mazkur yoʼnalishda jamoatchilik nazoratini olib borayotgan ekofaollar taqdirlanadi.

“Oʼzbekiston Respublikasida xizmat koʼrsatgan ekolog” faxriy unvonini taʼsis etish toʼgʼrisida”gi qonun loyihasining qabul qilinishi ekologiya va atrof muhitni muhofaza qilish masalalari sohasida faoliyat yuritayotgan xodimlar faoliyatini ragʼbatlantirishga huquqiy asos yaratadi, shuningdek, tarmoqning nufuzini oshirishga xizmat qiladi.