Xazonlarga o‘t qo‘yish atrof-muhitga jiddiy  zarar keltiradi. Masalan, bir tonna xazon yoqilganda atmosferaga 30 kg uglerod oksidi ajralib chiqadi. Shuningdek, havoga inson salomatligi va atrof-muhitga zarar yetkazuvchi boshqa moddalar, yaʼni oltingugurt angidridi, qurum, azot oksidi va murakkab tarkibli organik birikmalar – dioksinlar ham chiqariladi. 

Bundan tashqari, xazondan chiqayotgan tutun atmosfera tarkibidagi kislorod miqdorini kamaytiradi. Ayniqsa, chala yongan xazon oʻzidan zaharli gaz chiqaradi. Zararli moddalarga toʻyingan havodan nafas olgan kishining esa nafas yoʻllari, koʻzi hamda markaziy asab tizimi shikastlanadi. Shu bilan birga, organizmda oʻpka saratoni, bronxial astma kabi xavfli kasalliklar kelib chiqishi xavfi ortadi. 

Xazonni yoqishdan kelib chiqadigan zararli tutun, ayniqsa, bolalar, yurak-qon tomir nafas olish yoʻllari xastaliklariga chalingan hamda allergiyasi bor insonlarga koʻproq salbiy taʼsir ko‘rsatadi.

Oʻzbekiston Respublikasining Maʼmuriy javobgarlik toʻgʻrisidagi kodeksining 88-moddasiga ko‘ra dala va aholi punktlarida angʻiz, xazon va shox-shabbalarni yoki oʻsimliklarning boshqa qoldiqlarini yoqib yuborish atmosfera havosini zararli moddalar bilan ifloslantirishga olib kelsa, fuqarolarga bazaviy hisoblash miqdorining 3 baravaridan 5 baravarigacha, mansabdor shaxslarga esa – 5 baravaridan 10 baravarigacha miqdorda jarima solishga sabab boʻladi. 

Shuningdek, yongʻin sodir boʻlishi oqibatlaridan kelib chiqqan holda jinoiy javobgarlik ham qo‘llaniladi.

Hurmatli yurtdoshlar! Shox-shabbalar, o‘simliklar qoldiqlariga o‘t qo‘yish orqali ham qonunni buzishingiz, ham atrofdagi insonlarning salomatligiga salbiy ta'sir ko‘rsatishingiz mumkin! Shunday ekan, xazonlarni yoqmang!