Toshkentda ko‘p funksiyali majmua qurilishi yuzasidan jamoatchilik eshituvi o’tkazildi
2026-03-04 19:50:00 / Yangiliklar
Ma’lumot uchun, loyiha xalqaro “The Ritz-Carlton” brendi ostidagi 5 yulduzli mehmonxona hamda “Pasha Real Estate” brendi ostidagi “Baku Towers” nomli turar joy majmuasini o‘z ichiga oladi. Mehmonxona qurilishi 2028-yil oxiriga, turar-joy majmuasi qurilishi esa 2029-yil oxiriga rejalashtirilgan.
Loyihani amalga oshirishning joriy bosqichida 1150 nafarga yaqin ishchi jalb etilgan bo‘lib, ularning asosiy qismini mahalliy mutaxassislar tashkil etadi. Yaqin olti oy ichida 2000–2200 ga yaqin ish o’rni yaratish rejalashtirilgan.
Qurilish ishlari yakunlanganidan so‘ng kamida 500 ta doimiy ish o‘rni yaratiladi.
Jamoatchilik eshituvi davomida loyiha doirasida ekologik standartlarga amal qilinishi, xususan, hududdagi daraxtlarga alohida to’xtalib o’tildi. Xususan, “O‘rmon Invest” kompaniyasi bosh agronomi Doniyor To‘layev hududdan 10 ta daraxt kompaniya mutaxassislari tomonidan Tuyabo‘g‘iz suv ombori hududiga ko‘chirib o‘tkazilganligini,
hozirda agronomlar tomonidan parvarish ishlari olib borilayotganligini ta’kidladi.
“Biz qurilish jarayoni boshlanishidan avval qurilish ostiga tushgan daraxtlarni hududga borib o‘rganamiz. Keyin esa Botanika bog‘i, ilmiy-tadqiqot institutlari xodimlarini olib kelib, o‘sha hududni ko‘rsatamiz. Ulardan ilmiy ekspert xulosasi olganimizdan keyin, shu hududga olib chiqib, ko‘chirib o‘tqazamiz va u yerda himoya o‘rmon zonalari barpo etamiz.
Iqlimi, tuproq sharoiti bir-biriga mos kelganligi uchun aynan shu hududni – Tuyabo‘g‘iz suv ombori yon-atrofidagi lokatsiyani tanlaganmiz. Ko‘chirgan daraxtlarga ko‘p suv talab qilinganligi uchun sug‘orish maqsadida suvga yaqinroq bo‘lgan joyni tanlaganmiz”, — dedi D. To’layev.
Eshituv doirasida loyihada yashillik darajasini oshirishga alohida e’tibor qaratilishi, jumladan, majmua hududida 500 ga yaqin daraxt ekilishi hamda 1,3 gektar hudud ko‘kalamzorlashtirilishi qayd etildi.
Shuningdek, loyiha shahar infratuzilmasini yanada yaxshilashi, aholi uchun qulay servis xizmatlarini o‘z ichiga olgan zamonaviy va qulay shahar muhitini shakllantirishi, Toshkentning Markaziy Osiyo mintaqaviy markazi sifatidagi pozitsiyalarini mustahkamlashi, shaharning investitsiyaviy jozibadorligini oshirishi hamda O‘zbekistonning xalqaro investitsiyalar uchun ishonchli maydon ekanini yana bir bor tasdiqlashi aytib o’tildi.
“The Ritz-Carlton” mehmonxonasi va “Baku Towers” turar joy majmuasi qurilishi loyihasi barqaror iqtisodiy rivojlanish, shahar infratuzilmasini modernizatsiya qilish, yangi ish o‘rinlari yaratish va aholi turmush sifatini oshirishga qaratilgan strategik tashabbus hisoblanadi.