IHT Turizm vazirlari Islom konferensiyasining XII sessiyasi yakunlariga bagʻishlangan matbuot anjumani bo’lib o’tdi
2024-06-03 13:05:00 / Yangiliklar
Matbuot anjumanida nutq soʻzlagan Ekologiya, atrof-muhitni muhofaza qilish va iqlim oʻzgarishi vaziri Aziz Abduhakimov Islom hamkorligi tashkilotining Turizm vazirlari Islom konferensiyasining 12 sessiyasi samarali oʻtganini taʼkidladi.
“Anjumanda IHT turizm shaharlarini tanlash mezonlarini takomillashtirish, mumkin qadar kichik va istiqbolli shaharlarni tanlash orqali ularning turizm salohiyatini oshirishga kelishib olindi. Tashkilot hudida islom turizmini rivojlantirish boʻyicha strategik “yoʻl xaritasi”ni amalga oshirish, viza tartibini soddalashtirish, investitsiyalarni ragʻbatlantirish, islom turizmi maskanlari targʻiboti orqali oʻzaro turistik oqimni oshirish, kadrlar tayyorlash va standartlashtirish asosiy yoʻnalishlar sifatida belgilandi, — dedi vazir. — Shuningdek, IHTga aʼzo davlatlarga COMCEC, SESRIC, ICDT, IRCICA, ICESCO, ICCIA va SMIIC kabi institutlarning imkoniyatlari, ular tomonidan amalga oshirilayotgan loyiha va dasturlardan oʻz mamlakatlarida turizmni rivojlantirish uchun yanada koʻproq foydalanishni taklif qildik”.
Maʼlumot uchun, tadbir doirasida turizm sohasini diversifikatsiya qilish maqsadida ziyorat turizmi, ekoturizm va tibbiy turizmni rivojlantirishga kelishib olindi. Qolaversa, halol turizm xizmatlari standartlarini joriy etishga alohida eʼtibor qaratildi. Jumladan, Islom mamlakatlari standartlari asosida tasdiqlangan “Halol turizm xizmatlari – Umumiy talablar” hamda yangi ishlab chiqilayotgan halol tibbiyot turizmi standartlarini IHTga aʼzo davlatlarda keng targʻib qilish ilgari surildi.
Matbuot anjumanida Aziz Abduhakimov 2025-yil uchun Dakar shahri, 2026-yil uchun Qohira shahri va 2027-yil uchun Lahor shahri “Islom dunyosi turizm shahri” sifatida tanlanganini qayd etib, Senegal, Misr va Pokistonliklarni samimiy tabrikladi.
Anjuman yakunida OAV vakillari oʻzlarini qiziqtirgan savollarga javob olishdi.
Maʼlumot uchun, XII sessiyada Islom konferensiyasiga raislik Ozarbayjon Respublikasidan Oʻzbekiston Respublikasiga oʻtdi. Shuningdek, Turizm vazirlari Islom konferensiyasining XIII sessiyasini Qatar davlatida oʻtkazish boʻyicha qaror qilindi. Bundan tashqari, “Islom dunyosining muqaddas qadamjolari” nomli rangtasvir koʻrgazmasi, “Pahlavon Mahmud – Bahodirlar oʻyini“ xalqaro turniri ham tashkil qilindi.