O‘zbekiston Respublikasi Ekologiya va iqlim o‘zgarishi milliy qo‘mitasi

Amaliy yo‘nalishlardan biri sifatida hududlarni ko‘kalamzorlashtirish ishlari, ayniqsa Orolbo‘yi mintaqasida izchil olib borilmoqda. Joriy yilda ekologik vaziyatni barqarorlashtirish tadbirlari 150,7 ming gektar maydonni qamrab oldi. Shundan 145,2 ming gektari Orol dengizining qurigan tubi va unga tutash hududlarga to‘g‘ri keladi. Muynoq tumanida, shuningdek Buxoro, Navoiy va Xorazm viloyatlarining ayrim hududlarida katta hajmdagi yashil maydonlar barpo etildi. Respublikaning boshqa hududlarida qo‘shimcha 5,5 ming gektar yer maydoni ko‘kalamzorlashtirilib, bu chang-tuz bo‘ronlarini kamaytirish va mikroiqlim sharoitlarini yaxshilashga xizmat qilmoqda.

Shu bilan birga, iqlim siyosatining ilmiy asosi mustahkamlanmoqda. Xitoy Xalq Respublikasining Shinjon ekologiya va geografiya instituti hamda Shimoliy-G‘arbiy ekologiya va tabiiy resurslar instituti bilan hamkorlikda Markaziy Osiyo ekologiya va atrof-muhitni o‘rganish markazi tashkil etildi. Ushbu markaz faoliyati mintaqaviy iqlim jarayonlarini o‘rganish, moslashuv yechimlarini ishlab chiqish va xalqaro ilmiy hamkorlikni kengaytirishga yo‘naltirilgan.

Innovatsion texnologiyalarni joriy etishga ham alohida e’tibor qaratilmoqda. Ekologiya va iqlim o‘zgarishi milliy qo‘mitasi huzuridagi Iqlim o‘zgarishi milliy markazi Fransiyaning Seleris kompaniyasi bilan hamkorlikda sun’iy yog‘ingarchilik chaqirish usullarini o‘rganish bo‘yicha ilmiy tadqiqotlar o‘tkazdi. Ushbu texnologiyalarni qo‘llash bo‘yicha ishlab chiqilgan loyiha takliflari Hukumatga taqdim etilgan bo‘lib, hozirda ularning iqtisodiy samaradorligi va O‘zbekiston sharoitida qo‘llash imkoniyatlari tahlil qilinmoqda.

Manfaatdor vazirlik va idoralar bilan birgalikda havo ifloslanishini kamaytirish, qurg‘oqchilik va suv resurslarini boshqarish bilan bog‘liq xavflarni pasaytirish, shuningdek gidrometeorologiya xizmatini modernizatsiya qilishga qaratilgan loyiha konsepsiyasi ishlab chiqildi. Konsepsiya doirasida sun’iy yog‘ingarchilik texnologiyalarini o‘rganish va ularni mahalliylashtirish masalalari ham ko‘rib chiqilmoqda.

Mamlakatda amalga oshirilayotgan tashabbuslar amaliy tabiatni muhofaza qilish choralari, ilmiy salohiyatni rivojlantirish va innovatsiyalarni joriy etishni uyg‘unlashtirgan kompleks iqlim siyosatiga o‘tishni namoyon etmoqda. Bunday yondashuv O‘zbekistonga iqlim xavflarini izchil kamaytirish va “O‘zbekiston–2030” strategiyasi maqsadlariga muvofiq uzoq muddatli barqaror rivojlanish uchun mustahkam asos yaratish imkonini bermoqda.