O‘zbekiston Respublikasi Ekologiya va iqlim o‘zgarishi milliy qo‘mitasi

Markaz O‘zbekiston Respublikasi Ekologiya va iqlim o‘zgarishi milliy qo‘mitasi hamda Xitoy Fanlar akademiyasi (CAS) hamkorligi doirasida tashkil etildi. Loyiha doirasida Xitoyning ikki yetakchi ilmiy instituti – Shinjon ekologiya va geografiya instituti (XIEG) hamda Shimoli-g‘arb ekologiya va tabiiy resurslar instituti (NIEER) faol ishtirok etmoqda.

Ochilish marosimida davlat idoralari, ilmiy doiralar, diplomatik missiyalar va xususiy sektor vakillaridan iborat 100 dan ortiq mehmon qatnashdi. Qizil lenta Ekologiya vaziri o‘rinbosari Jusipbek Kazbekov hamda XIEG direktori Chjan Yuanmin tomonidan kesildi.

Uchrashuv davomida Jusipbek Kazbekov markazning asosiy vazifalarini qayd etib o‘tdi: “qurg‘oqchil ekotizimlar bo‘yicha raqamli ma’lumotlar bazasini yaratish, cho‘llanish va sho‘rlanish sharoitida atrof-muhitdagi o‘zgarishlarni prognoz qilish, shuningdek, cho‘l hududlari iqtisodiyotini rivojlantirish bo‘yicha innovatsion strategiyalarni ishlab chiqish”. Markaz to‘liq ishga tushgach, yiliga 50 ga yaqin mahalliy va xorijiy olimlarni qabul qilishi rejalashtirilgan bo‘lib, mintaqadagi eng yirik ekologik ma’lumotlar to‘plamlaridan biriga ega bo‘ladi.

XIEG direktori Chjan Yuanmin yangi ilmiy markaz “mintaqada o‘ziga xos birinchi shunday muassasa” bo‘lishi, u ilmiy hamkorlikni mustahkamlash va Markaziy Osiyo ekologik chaqiriqlariga yechim topishga qaratilgan keng ko‘lamli tadqiqotlarni amalga oshirishini ta’kidladi.

O‘rmon va yashil hududlarni ko‘paytirish, cho‘llanishga qarshi kurashish agentligi direktori Erkin Muxitdinov mamlakat hududining 80 foizi cho‘l va qurg‘oqchil yerlar ekanini eslatib, markazning o‘rmon xo‘jaligi samaradorligini oshirishdagi strategik roliga urg‘u berdi. Uning so‘zlariga ko‘ra, markazda olib boriladigan tadqiqotlar yer degradatsiyasiga qarshi kurashish, landshaftlarni tiklash va yashil hududlarni kengaytirishda muhim ilmiy asos bo‘lib xizmat qiladi.

Shuningdek, XIEG bilan muvaffaqiyatli hamkorlik tajribasi ham qayd etildi. Jumladan, Xitoy hamkorlari tomonidan taqdim etilgan urug‘lar asosida O‘zbekistonning beshta hududida galofit bog‘lari tashkil etildi.

Markaz xalqaro ilmiy hamkorlikni rivojlantirishning asosiy maydoniga aylanishi kutilmoqda. Qo‘shma tadqiqotlar, akademik almashinuvlar va innovatsion loyihalar Markaziy Osiyo davlatlari va Xitoy o‘rtasida atrof-muhitni muhofaza qilish hamda iqlim o‘zgarishiga moslashish bo‘yicha hamkorlikni yanada mustahkamlashga xizmat qiladi.