O‘zbekiston Respublikasi Ekologiya va iqlim o‘zgarishi milliy qo‘mitasi

Tadbirda so‘zga chiqqan ekologiya vazirining birinchi o‘rinbosari Obidjon Qudratov Samarqand so‘nggi yillarda madaniyatlararo muloqot va yirik xalqaro kun tartibining markaziga aylanganini ta’kidladi. U bunday tashabbuslar ekologik qadriyatlarni targ‘ib qilishda san’atning o‘rni va ta’sirini kuchaytirishini qayd etdi.

“Mazkur simpozium CITES CoP20 doirasida bu yerda olib borilgan global ekologik muloqotning ijodiy davomiga aylandi. Haykaltaroshlar sayyoramiz taqdiri va kelajak avlodlar oldidagi mas’uliyat haqida gap ketganda san’at tili naqadar kuchli bo‘lishi mumkinligini namoyish etdilar”, — dedi u.

Simpozium “Bizning sayyoramiz — bizning uyimiz” shiori ostida o‘tkazildi va Buyuk Britaniya, Xitoy, Hindiston, Eron, Oman, Gruziya, Yaponiya, Turkiya va boshqa davlatlardan kelgan 12 nafar xorijlik ijodkorlar hamda O‘zbekistondan 5 nafar ishtirokchini birlashtirgan jami 17 professional haykaltaroshni jamladi.

Bir oy davomida ular global ekologik chaqiriqlar, iqlim o‘zgarishi, barqaror shahar rivoji va aholining ekologik madaniyatini oshirish mavzulariga bag‘ishlangan qariyb 20 ta haykaltaroshlik asarlarini yaratdilar.

Simpozium doirasida ishtirokchilar uchun Samarqand va Buxoroga sayohatlar, san’at, turizm va ijodiy ta’lim yo‘nalishlari talabalari uchun mahorat darslari, shuningdek, haykaltaroshlik simpoziumlarini o‘tkazish bo‘yicha xalqaro tajribaga bag‘ishlangan taqdimotlar tashkil etildi. OAV vakillari ijodkorlar bilan suhbatlashish va yaratilgan asarlar haqida batafsil ma’lumot olish imkoniga ega bo‘ldi.

Simpozium doirasida yaratilgan barcha asarlar Toshkent va Samarqandning jamoat bog‘lari hamda yashil hududlariga o‘rnatiladi. Ushbu obidalar shaharlar madaniy landshaftining bir qismiga aylanib, tabiatga g‘amxo‘rlik qilish muhimligi haqida eslatib turadi.

Yopilish marosimi yakunida simpozium ishtirokchilariga sertifikatlar va pul mukofotlari topshirildi.