O‘zbekiston Respublikasi Ekologiya va iqlim o‘zgarishi milliy qo‘mitasi

Har yili sentabrdan noyabr oyi oxirigacha Yashil diplomatiya haftaliklari butun dunyo bo‘ylab YeI delegatsiyalari va hamkor davlatlarni birlashtiradi. Ushbu haftaliklarda keng ko‘lamli tabiatni muhofaza qilish tadbirlari — axborot kampaniyalari, seminarlar, ko‘rgazmalar, hasharlar, yoshlar, ta’lim muassasalari, nodavlat notijorat tashkilotlari, mahalliy hamjamiyatlar va xususiy sektor ishtirokida muhokamalar o‘tkaziladi.

Toshkent botanika bog‘idagi ekoaksiya YeIga a’zo davlatlar elchixonalari vakillari, fuqarolik jamiyati faollari, ko‘ngillilar, shuningdek, yoshlar — maktab o‘quvchilari va talabalarni o‘zida jamladi. Ishtirokchilar poytaxtning eng muhim yashil hududlaridan biri bo‘lgan, 2 000 dan ortiq o‘simlik turi o‘sadigan bog‘ni asrab-avaylashga o‘z hissasini qo‘shdi, shuningdek, tabiatga nisbatan mas’uliyatli munosabatda bo‘lish madaniyati targ‘ib qilindi.

Tadbir davomida atrof-muhitni muhofaza qilish har bir fuqaroning burchi ekanligi va bu kundalik odatlar hamda qarorlarga bog‘liqligi ta'kidlandi. Ommaviy joylarni toza saqlash — barchamizning umumiy vazifamizdir. Shu bilan birga, davlat va xalqaro hamkorlarning choralari qatorida har bir insonning shaxsiy hissasi umumiy muvaffaqiyatning eng muhim tarkibiy qismidir. Yevropa Ittifoqi va O‘zbekistonning ushbu qo‘shma aksiyasi iqlim o‘zgarishiga qarshi kurash, bioxilma-xillikni saqlash va barqaror rivojlanishni targ‘ib etish borasidagi hamkorlikni mustahkamlash yo‘lida yana bir qadam bo‘ldi.