Atrof-muhitga ehtiyotkorona munosabatda bo’lishga ilhomlantiruvchi bayroq
2025-11-18 13:00:00 / Yangiliklar
Bugun 18-noyabr — O‘zbekiston Respublikasi Davlat bayrog‘i qabul qilinganligining 34 yilligi respublika miqyosida keng nishonlanmoqda. Xususan, Ekologiya, atrof-muhitni muhofaza qilish va iqlim o‘zgarishi vazirligida “Bir Vatan, bir el, bir bayroq!” shiori ostida tadbir o‘tkazildi.
Tadbir davomida Davlat bayrog‘i xalqimizning mustaqillik yo‘lidagi dadil qadamlari, yurtimiz birligi va hamjihatligi timsoli ekanligi ta'kidlandi. Qolaversa, bayroqning tarixiy ahamiyati, unda mujassamlashgan tinchlik, erkinlik, yangilanish, barqarorlik va ezgu orzular ramzi alohida e’tirof etildi.
Bundan tashqari, Davlat bayrog‘i bevosita tabiatni asrash muhim ekanligini o‘zida mujassam etganligi, ya'ni undagi yashil rang tabiatdagi yangilanish ramzi, shu bilan birga, yashillik darajasini oshirish, ekologiya va atrof-muhitga e’tibor belgisi sifatida ham talqin qilinishiga e'tibor qaratildi.
