Koreya bilan hamkorlikda O‘zbekiston huquqiy axborot tizimini rivojlantirishning yangi bosqichi muhokama qilindi
2026-07-24 15:30:00 / Vazirlik yangiliklari
Adliya vazirligida Koreya Respublikasining KSP 2025/26 loyihasi doirasida O‘zbekiston huquqiy axborot tizimini takomillashtirish bo‘yicha amalga oshirilgan ishlar yakunlariga bag‘ishlangan yig‘ilish bo‘lib o‘tdi.
Unda Adliya vazirligi, "Adolat" milliy huquqiy axborot markazi hamda Koreya delegatsiyasi vakillari ishtirok etdi.
Yig‘ilishda loyiha doirasida erishilgan natijalar sarhisob qilinib, huquqiy axborot tizimini yanada rivojlantirish, sun’iy intellekt texnologiyalarini joriy etish, elektron qonunchilik infratuzilmasini takomillashtirish hamda Lex.uz platformasini modernizatsiya qilish bo‘yicha ishlab chiqilgan Axborot strategiyasi (ISP) va uni amalga oshirish yuzasidan yo‘l xaritasi taqdim etildi.
Shuningdek, ishtirokchilar loyiha natijalari, istiqboldagi ustuvor vazifalar va yangi hamkorlik yo‘nalishlari yuzasidan fikr almashib, o‘z takliflarini bildirdi.
Ta’kidlanganidek, mazkur loyiha O‘zbekistonda zamonaviy huquqiy axborot tizimini rivojlantirish, fuqarolar va tadbirkorlarning huquqiy axborotdan foydalanish imkoniyatlarini kengaytirish hamda davlatning raqamli huquqiy infratuzilmasini yanada takomillashtirishga xizmat qiladi.