O‘zbekiston Respublikasi Adliya vazirligi

Shveysariyaning Jeneva shahrida o‘tayotgan Butunjahon intellektual mulk tashkiloti (BIMT) Assambleyalarining 68-seriyasi doirasida O‘zbekiston Respublikasi Adliya vaziri o‘rinbosari – intellektual mulk masalalari bo‘yicha milliy organ rahbari Muzraf Ikramov hamda Rossiya Federatsiyasi Federal intellektual mulk xizmati (Rospatent) rahbari Yuriy Zubov o‘rtasida ikki tomonlama uchrashuv bo‘lib o‘tdi. Uchrashuv yakunida 2026–2027-yillarga mo‘ljallangan Qo‘shma chora-tadbirlar rejasi imzolandi.

Uchrashuv davomida:

O‘zbekiston va Rossiya o‘rtasida intellektual mulk sohasidagi hamkorlikning ustuvor yo‘nalishlari hamda Memorandum doirasidagi qo‘shma loyihalarni amalga oshirish masalalari muhokama qilindi;

mutaxassislar malakasini oshirish, qo‘shma o‘quv dasturlari, stajirovkalar va seminarlarni tashkil etish, patent ekspertizasi hamda patent ish yuritish sohasida tajriba almashishni kengaytirish yuzasidan fikr almashildi;

Patent ish yuritishini tezlashtirish dasturi (Patent Prosecution Highway – PPH) mexanizmini joriy etish istiqbollari hamda patent arizalarini ko‘rib chiqish samaradorligini oshirish masalalari ko‘rib chiqildi;

intellektual mulk sohasida davlat xizmatlarini takomillashtirish, raqamli yechimlarni rivojlantirish hamda biznes, ilmiy va ta’lim muassasalari, yosh ixtirochilar o‘rtasida huquqiy madaniyatni oshirish bo‘yicha hamkorlikni kengaytirishga kelishib olindi.

Uchrashuv yakunida tomonlar imzolangan Qo‘shma chora-tadbirlar rejasi O‘zbekiston va Rossiya o‘rtasidagi amaliy hamkorlikni yangi bosqichga olib chiqishi, ekspertlar almashinuvi, patent ekspertizasi, kadrlar salohiyatini oshirish hamda intellektual mulk sohasidagi qo‘shma tashabbuslarni izchil amalga oshirishga xizmat qilishini ta’kidladilar.