O‘zbekiston Respublikasi Prezidentining 2024-yil 5-iyundagi PQ–210-son qarori bilan tuzilgan “Manfaatlar to‘qnashuvi to‘g‘risida”gi Qonun ijrosini tashkil etish ishlarini muvofiqlashtirish bo‘yicha respublika idoralararo komissiyasi topshirig‘iga asosan Adliya vazirligi tomonidan mahalliy davlat hokimiyat organlarida “Manfaatlar to‘qnashuvi to‘g‘risida”gi Qonunda (keyingi o‘rinlarda – Qonun) belgilangan talab va mexanizmlarni amaliyotga joriy etish bilan bog‘liq masalalar o‘rganib borilmoqda.

Taqdim etilgan ma’lumotlarga ko‘ra, Namangan viloyati Yangiqo‘rg‘on, Uychi, Davlatobod va Pop tuman hokimi o‘rinbosarlarining tadbirkorlik subyektlaridagi ishtiroki bartaraf etilgan. Andijon viloyat hokimligining 1 nafar xodimi fermer xo‘jaligi tashkil etganligi aniqlanib, xodim o‘z lavozimidan ozod etilgan.

Shuningdek, Buxoro viloyati tuman va shahar hokimliklarida 15 nafar xodim tadbirkorlik subyekti ta’sischisi ekanligi aniqlangan. Ushbu holatlar yuzasidan viloyat hokimligining ko‘rsatmalari natijasida 7 ta tadbirkorlik subyekti tugatish jarayoniga o‘tkazilib, 8 ta mavjud manfaatlar to‘qnashuvi holati bartaraf etilgan.

Navoiy viloyatida 21 nafar xodim tadbirkorlik subyektlari ta’sischisi bo‘lgan holatlarni bartaraf etish yuzasidan tuman (shahar) hokimliklariga viloyat hokimining taqdimnomasi chiqarilgan.

Samarqand viloyati Jomboy, Kattaqo‘rg‘on, Nurobod, Pastrdarg‘om va Paxtachi tuman hokimliklarida tadbirkorlik subyekti ta’sischisi ekanligi aniqlangan xodimlarga tegishli ko‘rsatmalar berilgan.

Farg‘ona viloyatida bir paytning o‘zida tadbirkorlik subyekti ta’sischisi bo‘lgan 6 nafar hokimlik xodimi bilan tuzilgan mehnat shartnomasini bekor qilish, 7 nafar xodimni ta’sischilikdan chiqarish yoki tashkilotni tugatish choralari ko‘rilgan.

Mazkur davrda Toshkent shahar hokimligi va tuman hokimliklarida tadbirkorlik subyekti ta’sischisi ekanligi aniqlangan xodimlardan 6 nafari ta’sischilikdan chiqqan, 13 nafari bilan tuzilgan mehnat shartnomasi bekor qilingan.

Shuningdek, 11 nafar xodim ishtirokidagi tijorat tashkilotlari tugatish jarayoniga o‘tkazilib, 2 nafar xodim ishtirokidagi tijorat va notijorat tashkilotlari davlat reyestridan chiqarilgan va 4 nafar xodimning tijorat tashkilotidagi rahbarlik faoliyati tugatilgan. Shahar hokimligida 49 nafar xodim bilan profilaktik suhbat o‘tkazilgan va 55 nafar xodim bilan bog‘liq holat odob-axloq komissiyalarida muhokama qilinib, “ogohlantirish” chorasi qo‘llangan.

Qashqadaryo viloyati Yakkabog‘, Nishon, Dehqonobod tuman va Shahrisabz shahar hokimliklarida 4 ta ehtimoliy manfaatlar to‘qnashuvi holatlari aniqlangan. Viloyat hokimligi tizimidagi tashkilotlarga ogohlantirish xatlari yuborilgan. 2026-yilning o‘tgan davrida 283 nafar xodim yozma ravishda ogohlantirilgan. Shu bilan birga, viloyat hokimligi (73 nafar), tizim tashkilotlari (58 nafar) va tuman (shahar) hokimliklari (392 nafar) xodimlari Korrupsiyaga qarshi kurashish virtual akademiyasida sertifikat olgan.

Shuningdek, Buxoro viloyati G‘ijduvon tuman hokimining qishloq va suv xo‘jaligi masalalari bo‘yicha o‘rinbosari va uning ukasi bevosita bo‘ysunuvida faoliyat ko‘rsatishi aniqlanib, tushuntirish ishlari olib borilgan va boshqa ishga o‘tkazilgan. Buxoro viloyat hokimligi boshqaruv apparatining 3 nafar xodimida manfaatlar to‘qnashuvi holati bilan bog‘liq xavflar aniqlanib, to‘liq bartaraf etilgan.

Toshkent viloyat hokimligi tomonidan soliq organlaridan olingan ma’lumotlar asosida aniqlangan manfaatlar to‘qnashuvi holatlarini bartaraf etish yuzasidan aloqador xodimlar ogohlantirilgan va boshqa choralar ko‘rilgan.

Bundan tashqari, Andijon, Buxoro va boshqa hududlarda hokimliklar boshqaruv apparati xodimlarining korrupsiyaviy holatlar hamda manfaatlar to‘qnashuviga yo‘l qo‘ymaslik yuzasidan kafolat xatlari olingan.

Andijon viloyati hokimligi Odob-axloq komissiyasi yig‘ilishi 2026-yil 26-mayda o‘tkazilib, Qonun talablari ijrosini ta’minlash masalasi muhokama qilingan hamda tuman (shahar) hokimliklariga tegishli topshiriqlar berilgan.

Shuningdek, Qonunga rioya etilishi masalasi Xorazm viloyati hokimi huzurida ham har oy muhokama qilib borilgan. Ushbu viloyatdagi barcha korxona va tashkilotlar rahbarlari, tuman (shahar)lar hokimliklariga korrupsiya holatlari hamda manfaatlar to‘qnashuviga yo‘l qo‘ymaslik bo‘yicha viloyat hokimining ogohnomasi yuborilgan.

Qonun mazmun-mohiyatini davlat xizmatchilariga yetkazish uchun Buxoro, Farg‘ona, Jizzax, Qashqadaryo va boshqa hududlarda huquqiy targ‘ibot ishlari olib borilgan. Jumladan, Buxoro viloyati hokimligi tomonidan 2026-yil may-iyun oylarida viloyatdagi barcha tuman (shahar) hokimliklarida uchrashuvlar tashkil etilib, tushuntirish ishlari o‘tkazilgan.

Hokimliklar tomonidan korrupsiya yoki manfaatlar to‘qnashuvi masalalariga oid murojaat yuborish uchun aloqa kanallari haqidagi ma’lumotlar rasmiy veb-saytlar va ijtimoiy tarmoqlar orqali tarqatilgan. Hokimliklarga manfaatlar to‘qnashuvi masalalariga oid murojaatlar kelib tushmagan. Hokimliklar va ularning tizimida odob-axloq komissiyalari tashkil etilgan.