Yoshlar bandligini ta’minlash — Yangi O‘zbekiston taraqqiyotining muhim omili
2026-05-25 17:00:00 / Vazirlik yangiliklari
Bugun O‘zbekiston xalqaro islomshunoslik akademiyasida “Bitiruvchi yoshlar – Uchinchi Renessans poydevori” shiori ostida bitiruvchi talabalar hamda ish beruvchi tashkilotlar vakillari ishtirokida uchrashuv tashkil etildi.
Tadbir yoshlarning bandligini ta’minlash, ularni mehnat bozoriga samarali yo‘naltirish hamda bitiruvchilar va ish beruvchilar o‘rtasida bevosita muloqotni yo‘lga qo‘yish maqsadida o‘tkazildi.
Tadbirda adliya vaziri o‘rinbosari N.Muxammadiyev ishtirok etib, yoshlarni kasbga yo‘naltirish, ularning huquqiy ongi va faolligini oshirish hamda munosib ish bilan ta’minlash masalalariga bag‘ishlangan ma’ruza qildi.
Shuningdek, mamlakatimizda yoshlar siyosati doirasida amalga oshirilayotgan islohotlar, yoshlarga yaratilayotgan imkoniyatlar hamda “Yangi O‘zbekiston yoshlari – 2030” strategiyasi doirasidagi ustuvor vazifalar haqida so‘z yuritildi.
Tadbir davomida vazirlik va idoralar, turli tashkilot hamda korxonalar vakillari tomonidan talabalarga mavjud vakant ish o‘rinlari, amaliyot va kelgusidagi hamkorlik imkoniyatlari haqida ma’lumotlar berildi.