O‘zbekiston Respublikasi Ekologiya va iqlim o‘zgarishi milliy qo‘mitasi

Ekologiya, atrof-muhitni muhofaza qilish va iqlim o‘zgarishi vazirligi tomonidan 1-aprel — "Xalqaro qushlar kuni" munosabati bilan respublikamizning barcha hududlarida “Qushlar bizning do‘stimiz” eko-aksiyasi o‘tkazildi.

Toshkent botanika bog‘ida tashkil etilgan aksiyada yosh eko-faollar, o‘quvchilar, soha mutaxassislari va volontyorlar, 200 ga yaqin ishtirokchi qatnashdi. 

"Qushlar bioxilma-xillikni asrashda muhim o‘rin egallaydi. Chunki tabiat uyg‘onganida qushlar o‘simliklarning changlanib, ko‘payishini ta'minlaydi. Shuning uchun ham ularni asrash dolzarb vazifalardan biri hisoblanadi, — dedi Ekologiya vazirligi bo‘lim boshlig‘i Abdurashid Sodiqov. — Samarqandda bo‘lib o‘tgan COP14  xalqaro konferensiyasida aynan ko‘chmanchi qushlarni asrash masalasi ham muhokama qilindi. Oʻzbekiston Afrika va Yevroosiyoda koʻchmanchi yirtqich qushlarni saqlash boʻyicha oʻzaro anglashuv memorandumiga qoʻshildi. Bu, albatta, nafaqat O‘zbekiston, balki butun mintaqani qushlar uchun qulay makonga aylantiradi".

Aksiya davomida yosh ishtirokchilar “Eng yaxshi qushlar bilimdoni”, “Eng yaxshi qush ini” va “Qushlar yosh rassomlar nigohida” nominatsiyalari bo‘yicha bellashishdi. Birinchi nominatsiyada yoshlarimizning qushlar borasidagi bilimlari sinovdan o‘tkazilgan bo‘lsa, ikkinchi nominatsiyada eng yaxshi qush inini yasagan ishtirokchilar aniqlandi. “Qushlar yosh rassomlar nigohida” nominatsiyasida esa ishtirokchilar tomonidan chizilgan qushlar suratlari baholandi.

“Bugungi tadbir 100 dan ortiq maktab o‘quvchilarini birlashtirdi. Biz ularga interaktiv tarzda agar ulardan biri yerda qora uzunqanotni uchratib qolsa yoki uyasidan qulab tushgan polaponni ko‘rsa, ularni asrab-avaylash va tabiatga qo‘yib yuborish uchun nima qilish kerakligini tushuntirdik", — dedi O'zbekiston Qushlarni muhofaza qilish jamiyati vakili Oleg Kashkarov.

Yakunda barcha ishtirokchilarga sovg‘alar topshirildi. Shuningdek, har bir nominatsiya bo‘yicha 1, 2, va 3-o‘rinlar aniqlanib, g‘oliblar taqdirlandi. 

“Eng yaxshi qushlar bilimdoni” nominatsiyasi g‘oliblari:  
I o‘rin — Rafael Ismailov 
II o‘rin — Hojiakbar Tojiyev 
III o‘rin — Adelina Ergasheva  

“Eng yaxshi qush ini” nominatsiyasi g‘oliblari: 
I o‘rin —  Odilbek Yo‘ldoshev
II o‘rin — Ozodbek Olimjonov 
III o‘rin — Daler Toshmatov 

“Qushlar yosh rassomlar nigohida” nominatsiyasi g‘oliblari: 
I o‘rin — Abdulloh Xo‘jamatov
II o‘rin — Nozima Toshmaxatova 
III o‘rin —  Soliha Yashinova, Aziza Xolmurodova  

Ma’lumot uchun, “Xalqaro qushlar kuni” 1902-yildan, ya’ni qishloq xo‘jaligiga foydali qushlarni muhofaza qilishga qaratilgan Xalqaro konvensiya qabul qilinganidan beri nishonlanadi. Maqsad yosh avlodda qushlarga nisbatan mehr uyg‘otish, ularning ongida ekologik madaniyat va tabiatga daxldorlik hissini shakllantirishdir. 

Bugungi kunda yurtimizda jami 487 turdagi qushlar mavjud. Bulardan 52 turdagi qushlar O‘zbekiston Qizil kitobiga kiritilgan, yaʼni noyob qushlar hisoblanadi. Qushlarning 86 turi oʻtroq, 122 turi uyalovchi, uchib oʻtuvchi, 63 turi faqat uchib oʻtuvchi, 80 turi uchib oʻtuvchi, qishlovchi, 16 turi qishlovchi, 54 turi uyalovchi, uchib oʻtuvchi va qishlovchi, 55 turi tasodifan uchib keluvchi (kamdan-kam holda uchrovchi) qushlar hisoblanadi. Yurtimizda uchrovchi qushlarning 320 turi (67,2 foizi) ko‘chib yuruvchi qushlardir.