Ekologiya vazirligi xodimlari ishtirokida “Zakovat” o‘yini o‘tkazildi
2024-12-14 16:00:00 / Yangiliklar
Tadbir Oʻzbekiston Respublikasi Vazirlar Mahkamasining “2024-2025-yillarda jamiyatda huquqiy madaniyatni yuksaltirish boʻyicha chora-tadbirlar dasturini tasdiqlash toʻgʻrisida”gi qarori ijrosini taʼminlash,yoshlarning atrof-muhitni muhofaza qilish borasidagi bilim va ko‘nikmalarini oshirish va bu boradagi dalxdorlik hissini kuchaytirish maqsadida tashkil etildi. O‘yinni Ekologiya vazirining birinchi o‘rinbosari Obidjon Qudratov va Yoshlar ishlari agentligi direktori oʻrinbosari Abdulaziz Mo’minov ochib berdi.
“Mamlakatimizda oʻsib kelayotgan avlodning bilim va tafakkurini rivojlantirish, xususan, ularning ekologik bilimlari va mas’uliyatini yuksaltirish yoshlarga oid davlat siyosatining ustuvor yoʻnalishini tashkil etadi. Davlatimiz yoshlarning rivojlanishini, ularning ijodiy va intellektual salohiyatini qoʻllab-quvvatlashni asosiy maqsad qilib belgilagan, — dedi Obidjon Qudratov. — “Zakovat” kabi intellektual musobaqalar yoshlarning kelajakda bilimli mutaxassislar va jamiyatda oʻz oʻrniga ega har tomonlama yetuk fuqarolar boʻlib rivojlanishlari uchun muhim qadamdir”.
Abdulaziz Mo’minov esa bugun yoshlarning salohiyati har tomonlama oshib borayotganini ta’kidladi.
Intellektual o‘yinda Ekologiya vazirli, vazirlikning tizim tashkilotlari, hududiy bo‘linmalaridan tuzilgan 26 ta jamoa ishtirok etdi. 200 nafardan ortiq ishtirokchi nafaqat mantiqiy, balki atrof-muhitni muhofaza qilish sohalarini ham qamrab olgan 24 ta savolga javob izlashdi va o‘z bilimlarini sinovdan o‘tkazishdi.
O‘yin davomida savollarga eng ko‘p to‘g‘ri javob bergan Davlat ekologik sertifikatlashtirish va standartlashtirish markazining "Green standart” jamoasi birinchi oʻrinni, Gidrometeorologiya ilmiy-tadqiqot institutining “GMITI yoshlari” jamoasi ikkinchi oʻrinni, Turizm qo‘mitasining “Tahlilchilar” jamoasi esa uchinchi o‘rinni egalladi. G‘oliblar va ishtirokchilar munosib taqdirlandi.