Maʼlumot uchun, BMT UNFCCCga aʼzo davlatlar har yili taraqqiyotni baholash va iqlim oʻzgarishiga qarshi kurash boʻyicha koʻp tomonlama chora-tadbirlarni muhokama qilish uchun yigʻiladi. Bugungi kunga qadar Konvensiyaga 198 davlat qoʻshilgan.

COP29 doirasida Oʻzbekiston hukumati tomonidan oʻzbek madaniyati, tarixi va noyob muhiti asosidagi anʼanaviy tamoyillar va texnologiyalarni aks ettiruvchi Milliy pavilyon ochiladi. Anʼanaviy oʻzbek xonadoni – “hovli” namunasi boʻlgan pavilyon yillar davomida har bir oʻzbek xonadoni maskani boʻlib kelgan hovli muhitini oʻz ichiga oladi. Bu yerda tabiat uyning bir qismiga aylanadi: uzum bilan qoplangan yashil maydonlar soya va qulaylik yaratadi, anʼanaviy materiallar va qadimiy qurilish usullari esa ekologik toza va barqarorlikni oʻzida mujassam etadi.

Ikki haftalik konferensiya dasturi yuqori darajadagi yalpi majlislar, dunyo yetakchilarining iqlim boʻyicha sammiti, Ijroiya kengashi yigʻilishlari, muvofiqlashtiruvchi uchrashuvlar, yoshlar iqlim forumi, iqlim boʻyicha jahon sammiti, 17-Nayrobi ish dasturi koordinatorlari forumi, moliya, sarmoya, savdo, yashil energiya, texnologiya va innovatsiyalar, sogʻliqni saqlash, inson taraqqiyoti va yoshlar, oziq-ovqat, qishloq xoʻjaligi, suv resurslari, tabiat va bioxilma-xillik, transport va turizm, gender tengligi va boshqa mavzularda davra suhbatlari va seminarlarni oʻz ichiga oladi. 

Shuningdek, COP29 koʻrgazmasida qator tashabbuslar taqdim etiladi, jumladan, Milliy pavilyon doirasida Suv xoʻjaligi vazirligi, Energetika vazirligi, Iqtisodiyot va moliya vazirligi ishtirokida 20 dan ortiq tadbirlar tashkil qilish, shuningdek, qator ikki tomonlama va koʻp tomonlama uchrashuvlar oʻtkazib, mintaqaviy va xalqaro hamkorlar bilan shartnomalar imzolash koʻzda tutilgan.

Milliy pavilyon doirasida quyidagi asosiy tadbirlar rejalashtirilgan:

— “Zamin” xalqaro jamoat fondi bilan birgalikda barcha qatnashuvchi davlatlar vakillari ishtirokida Xalqaro yoshlar strategiyasini imzolash rasmiy marosimi, shuningdek, ekologik taʼlim loyihalari va tashabbuslari taqdimoti;
— Turkiy Davlatlar Tashkiloti (TDT), Shanxay Hamkorlik Tashkiloti (SHHT) mamlakatlari Turkiy ekologik forumi vazirlari yigʻilishi;
— Ozarbayjon Respublikasi va Oʻzbekiston Respublikasining qoʻshma tashabbusi sifatida rejalashtirilgan BMT Xalqaro Migratsiya Tashkilotiga (XMT) aʼzo davlatlar bilan iqlim migratsiyasi deklaratsiyasi (Silk Road Declaration) boʻyicha tadbir;
— Orolboʻyi mintaqasi boʻyicha koʻp sheriklik maqsadli jamgʻarmasi tadbiri. Tadbir BMTTDning Oʻzbekistondagi muvofiqlashtiruvchi ofisi bilan hamkorlikda tashkil etiladi.

Umuman olganda, Oʻzbekiston delegatsiyasi konferensiya sessiyalari va boshqa asosiy hamda yordamchi tadbirlarda faol ishtirok etishni maqsad qilgan.