O‘zbekiston Respublikasi Ekologiya va iqlim o‘zgarishi milliy qo‘mitasi

Tadbir davomida vazirlik xodimlari boshpanadagi itlarga mehr ko‘rsatishdi. Hayvonlarni sterilizatsiya qilish va emlash masalalariga alohida e’tibor qaratildi. 

"Hayot" boshpanasi 2018-yilda uysiz, qarovsiz qolgan itlarni parvarishlar, ularga g‘amxo‘rlik qilish maqsadida tashkil etilgan. Bugungi kunda bu yerda 7000 dan ortiq itlar parvarish qilinadi. Toshkent viloyatining Qibray, Chirchiq, Parkent, Bo’stonliq, Zangiota va boshqa hududlaridan qarovsiz qolgan itlar olib kelinadi. Qibray tumanidagi tibbiyot muassasalari bilan hamkorlikda bu jonivorlarni doimiy ko‘rikdan o‘tkazamiz, — dedi boshpana rahbari Iroda Matkarimova. —  Har yili Brijit Bardo xalqaro fondidan mutaxassislar tashrif buyurishadi, hayvonlarni emlashadi, g‘amxo‘rlik ko‘rsatishadi. Shu paytga qadar 6000 ga yaqin itlar uy-joylarga tarqatildi". 

Ma'lumot uchun, Brijit Bardo fondiga taniqli fransuz aktrisasi Brijit Bardo tomonidan 1986-yilda hayvonlarni himoya qilish maqsadida asos solingan. Fond Janubiy Afrikada fillar, Avstraliyada koalalar, Bolgariyada ayiqlar va Kamerunda maymunlar uchun boshpana yaratishga yordam bergan. Ayni damda Markaziy Osiyoda ham qarovsiz hayvonlarni asrab qolish maqsadida faoliyat olib bormoqda.

Tadbir davomida boshpanasiz hayvonlarning yashash sharoitlarini yaxshilash, bu borada jamoatchilikning xabardorligini oshirish masalasiga alohida e'tibor qaratildi. 

Ma’lumot uchun, Butunjahon boshpanasiz hayvonlar kuni avgust oyining har uchinchi shanbasida nishonlanadi. Bu sana hayvonlarga insonparvarlik va mas'uliyat bilan munosabatda bo'lish zarurligi haqida muhim eslatma bo'lib xizmat qiladi. Shu kuni butun dunyo bo‘ylab boshpanasiz hayvonlar uchun mablag‘ yig‘ish maqsadida turli xayriya tadbirlari, konsertlar, aksiyalar va boshqa tadbirlar o‘tkaziladi.

Ekologiya vazirligi yurtdoshlarimizni boshpanasiz, qarovsiz qolgan hayvonlarga g‘amxo‘rlik qilishga, ularni asrab-avaylashga chaqiradi. Zero ular bizning mehrimizga muhtojdir.