O‘zbekiston Respublikasi Ekologiya va iqlim o‘zgarishi milliy qo‘mitasi

Tadbirning ochilish marosimida Ekologiya, atrof-muhitni muhofaza qilish va iqlim o‘zgarishi vaziri o‘rinbosari Jusipbek Kazbekov, Sirdaryo viloyati hokimi Akmaljon Maxmudaliyev va O’zbekiston Milliy media assotsiatsiyasi Boshqaruvi raisi Sherzodxon Qudratxo’ja ishtirok etishdi.

“Butunjahon atrof-muhitni muhofaza qilish  kuni har yili 5-iyun kuni nishonlanadi. 2024-yilda bayram "Ekotizimlarni qayta tiklash" shiori ostida o'tkazilmoqda. Ushbu bayramning ahamiyati yildan-yilga ortib bormoqda, chunki iqlim o'zgarishi va cho'llanish kabi ekologik muammolar butun dunyoda kuchayib bormoqda. Bugungi tadbirlar atrof-muhitni muhofaza qilish muhimligini keng targ‘ib qiladi. O‘ylaymizki, yurtimiz aholisi, ayniqsa, yoshlar kelajak avlodlar uchun tabiatni sof holicha asrashga o‘zining munosib hissasini qo‘shadi”, — dedi vazir o‘rinbosari J. Kazbekov.

Tadbirlar doirasida “Biz isrofgarchilikka qarshimiz” eko-tanlovi, plogging, etnosport o‘yinlari, gastronomik festival, yosh rassomlar ko‘rgazmasi, milliy hunarmandchilik, folklor va milliy kuylar festivali, shuningdek, intellektual “Zakovat” o‘yini tashkil etildi.

Tadbirlar so‘ngida plogging va etnosport o‘yinlari ishtirokchilari Ekologiya, atrof-muhitni muhofaza qilish va iqlim o‘zgarishi vazirligining sertifikatlari bilan taqdirlandi. “X-Factor” shousi ishtirokchilarining konserti hamda “Tabiatni asrang” qo‘shig‘i taqdimoti bo‘lib o‘tdi.

Shu o'rinda aytish joizki, Ekologiya, atrof-muhitni muhofaza qilish va iqlim o‘zgarishi vazirligi, Sirdaryo viloyati hokimligi va O'zbekiston Milliy media assotsiatsiyasi hamkorligida o'tkazilgan festival keng jamoatchilik, ayniqsa, yoshlar e’tiborini ekologik muammolarga jalb etish maqsadida tashkil etildi. Milliy sport o‘yinlari, madaniy-ko‘ngilochar tadbirlarni  o'tkazish orqali mamlakatimizning noyob bioxilma-xilligini saqlash, ekoturizmni rivojlantirish, ekologik madaniyatni yuksaltirish kabi vazifalar keng targ'ib etildi