Ўзбекистон Республикаси Транспорт вазирлиги

Транспорт вазирлиги ҳузуридаги Жамоатчилик кенгаши аъзолари ушбу йўналишда Қашқадарё вилоятида амалга оширилаётган ишлар ҳолати билан яқиндан танишиш мақсадида вилоят транспорт бошқармасида бўлди.

 Бошқарма мутасаддилари иштирокида вилоятда жамоат транспорти тизимини ривожлантириш борасида олиб борилаётган ишлар, “Жамоат транспорти тизимини ислоҳ қилиш чора-тадбирлари тўғрисида”ги ПҚ–59-сонли қарорда белгиланган вазифалар ижроси муҳокама этилди.  

Мутахассислар қарор ижроси доирасида ишлаб чиқилган “Қарши шаҳри транспорт ва йўл-транспорт инфратузилмасини ривожлантириш Бош режаси” га мувофиқ бажарилган ишлар ва келгусидаги режалар юзасидан батафсил маълумот беришди.

Бош режага мувофиқ Қарши шаҳрида йўналишлар тармоғи қайта шакллантирилиб, 21 та шаҳар автобус йўналиши ташкил этилди. Мазкур йўналишларда қатновлар брутто-шартномаси асосида ташкил этилмоқда. Ҳозирда 8 та йўналишда қатновлар ушбу янги тизим орқали йўлга қўйилган. Йўналишларда жами 96 та замонавий  автобус йўловчиларга муносиб хизмат кўрсатмоқда.

Бугун ушбу соҳада рўй бераётган ўзгаришлар ҳудуд аҳолиси турмушида акс этиб, одамлар жамоат транспорти қулайликларидан кундалик ҳаётда фойдаланяпти.

Кенгаш аъзолари транспорт бошқармаси ҳузурида ташкил этилган “Йўловчи ташишни мониторинг ва назорат қилиш” Давлат муассасаси ҳамда “Автоматлаштирилган диспетчерлик хизмати” фаолияти билан ҳам яқиндан танишди.

Шунингдек, жамоат транспорти хизматлари кўрсатишда молиялаштиришнинг янги брутто-шартнома тизимига ўтилиши натижасида хизмат сифати қай даражада ортгани, йўловчи ташиш соҳасида фаолият кўрсатувчи тадбиркорлар ва аҳолининг ушбу тизим юзасидан фикрлари ўрганилди.   

Жамоатчилик кенгаши аъзолари томонидан Қарши ва Шаҳрисабз шаҳарларида транспорт инфратузилмасини ривожлантириш, инклюзив транспорт  тизимини барпо этиш борасидаги ишлар ҳолати мониторинг қилинди.