Транспорт вазирлари халқаро транспорт йўлакларини ривожлантириш ва ташувларни рақамлаштириш масалаларини муҳокама қилди
2026-10-15 17:00:00 / Янгиликлар
Тадбирда делегациялар ва транспорт идоралари раҳбарлари, дипломатик корпус ва халқаро ташкилотлар вакиллари иштирок этди. Давра суҳбатида иштирокчилар халқаро транспорт йўлакларини ривожлантириш, логистика занжирлари самарадорлигини ошириш ва транспорт жараёнларини рақамлаштириш масалаларини муҳокама қилди.
Инфратузилма режаларини мувофиқлаштириш, давлат чегараларини кесиб ўтишда тўсиқларни бартараф этиш ва рақамли ечимларни жорий этишга алоҳида эътибор қаратилди.
Ўзбекистон Республикаси транспорт вазири Илҳом Махкамов замонавий дунёда фақат биргина давлат чегарасида самарали транспорт тизимини қуриш мумкин эмаслигини таъкидлади.
Бизнинг умумий устувор вазифамиз – юклар ҳаракатидаги бюрократик тўсиқларни бартараф этиш орқали ҳақиқий маънодаги “узлуксиз” транзит йўлакларини шакллантиришдан иборат. Божхона ва транзит тартиб-таомилларини уйғунлаштириш ва логистика занжирларини бирлаштириш йўли билан минтақамизни глобал бозорлар ўртасидаги ишончли ва рақобатбардош кўприкка айлантиришимиз мумкин, – деди Илҳом Махкамов.
Учрашув якунида иштирокчилар транспорт соҳасидаги ҳамкорликнинг устувор йўналишлари ва халқаро ташувларни янада ривожлантириш бўйича амалий чора-тадбирлар юзасидан фикр алмашди.
Муҳокама мамлакатлар ўртасидаги транспорт-логистика алоқаларини мустаҳкамлаш бўйича ёндашувларни мувофиқлаштириш ва қўшма ечимларни ишлаб чиқиш учун платформага айланди.