Ўзбекистон Республикаси Транспорт вазирлиги

Мазкур тадбир Саноат кооперацияси ва давлат харидлари агентлиги, Ўзбекистон Республикаси Транспорт вазирлиги, Самарқанд вилояти ҳокимлиги ҳамда транспорт тармоғининг йирик давлат буюртмачилари ва корхоналари ҳамкорлигида ташкил этилди. Кўргазманинг асосий мақсади транспорт соҳасида маҳаллий ишлаб чиқаришни кенгайтириш, саноат кооперациясини ривожлантириш, импорт ўрнини босувчи маҳсулотлар ишлаб чиқаришни рағбатлантириш ҳамда давлат буюртмачилари ва ишлаб чиқарувчилар ўртасида тўғридан-тўғри ҳамкорликни йўлга қўйишдан иборат бўлди.

Кўргазмада транспорт тармоғининг 5 та йирик корхонаси, 80 дан ортиқ маҳаллий ишлаб чиқарувчи иштирок этиб, 2 мингдан зиёд маҳсулот ва технологик ечимлар намойиш этилди. Экспозитсияларда темир йўл, фуқаро авиацияси, автомобиль йўллари, шаҳар транспорти ва логистика йўналишлари учун ишлаб чиқарилган замонавий ускуналар, эҳтиёт қисмлар, инновацион технологиялар, илмий ишланмалар ҳамда истиқболли инвестиция лойиҳалари тақдим этилди.

Икки кун давом этган кўргазмада 1 500 нафардан ортиқ тадбиркор, ишлаб чиқарувчи, инвестор, давлат буюртмачилари, илмий муассасалар ва молия институтлари вакиллари иштирок этди. Тадбир транспорт саноати учун нафақат маҳсулотлар намойиши, балки тажриба алмашиш, янги ҳамкорлик алоқаларини ўрнатиш ва истиқболли лойиҳаларни муҳокама қилиш майдонига айланди.

Кўргазманинг энг муҳим жиҳатларидан бири шундаки, транспорт соҳасининг йирик буюртмачилари ўзларининг жорий ва истиқболдаги харид эҳтиёжлари, 2026 йил ва ундан кейинги даврга мўлжалланган харид режалари, маҳсулотларга қўйиладиган техник талаблар, сифат мезонлари ҳамда йиллик эҳтиёж ҳажми ҳақида батафсил маълумот берди. Бу эса маҳаллий ишлаб чиқарувчиларга бозор талабини чуқур ўрганиш, ишлаб чиқаришни диверсификация қилиш, янги маҳсулотларни ўзлаштириш ва давлат буюртмаларида фаол иштирок этиш учун муҳим имконият яратди.

Шунингдек, кўргазма доирасида бугунги кунда импорт қилинаётган, маҳаллийлаштирилган ҳамда келгусида мамлакатимизда ишлаб чиқарилиши тавсия этилаётган маҳсулотлар алоҳида йўналишлар кесимида намойиш этилди. Натижада тадбиркорлар импорт ўрнини босувчи маҳсулотларни ишлаб чиқариш бўйича истиқболли лойиҳаларни шакллантириш, янги кооперация алоқаларини йўлга қўйиш ва инвестицияларни жалб этиш юзасидан амалий тавсиялар олдилар.

Тадбир якунларига кўра, давлат харидлари доирасида 10 мингдан ортиқ шартнома имзоланди. Уларнинг умумий қиймати 714 миллиард сўмни ташкил этди. Мазкур келишувлар транспорт тармоғида маҳаллий корхоналар иштирокини янада кенгайтириш, ишлаб чиқариш қувватларини ошириш, янги иш ўринларини яратиш ва маҳаллий контент улушини кўпайтириш учун муҳим иқтисодий асос бўлиб хизмат қилади.

Кўргазма якунида инновацион ёндашуви, илғор технологик ечимлари ва саноат кооперациясини ривожлантиришга қўшган ҳиссаси билан ажралиб турган иштирокчилар тантанали равишда тақдирланди. Ғолиблар “Энг яхши инновацион стенд”, “Энг истиқболли инновацион стартап”, “Энг истиқболли транспорт лойиҳаси”, “Импорт ўрнини босувчи энг яхши лойиҳа” ҳамда “Энг самарали саноат занжири лойиҳаси” номинациялари бўйича эътироф этилди.

“Миллий саноат занжири” кўргазмаси транспорт тармоғида маҳаллий ишлаб чиқарувчиларни қўллаб-қувватлаш, саноат кооперациясини мустаҳкамлаш, инновацион лойиҳаларни амалиётга жорий этиш ва давлат харидларида маҳаллий маҳсулотлар улушини ошириш йўлидаги муҳим қадамлардан бири бўлди. Мазкур платформа келгусида транспорт соҳасининг барқарор ривожланиши, замонавий ишлаб чиқаришларни кенгайтириш ҳамда миллий иқтисодиётнинг рақобатбардошлигини янада оширишга хизмат қилиши билан аҳамиятлидир