Транспорт вазирлиги "Eco Expo Central Asia 2026" халқаро кўргазмасида “яшил транспорт” лойиҳаларини тақдимот қилмоқда
2026-06-04 16:00:00 / Янгиликлар
Самарқандда бўлиб ўтаётган Глобал экологик жамғарманинг (ГЕФ) саккизинчи Ассамблеяси ҳамда унинг доирасида ташкил этилган “Eco Expo Central Asia 2026” халқаро кўргазмасида Транспорт вазирлиги “Яшил транспорт” лойиҳаларини БМТ Тараққиёт Дастури билан ҳамкорликда тақдимот қилмоқда.
Павилённинг транспорт соҳасига алоқадор қисмида илғор экологик технологияларни жорий этиш, электромобиллик соҳасида тажриба алмашиш ва шаҳарларда барқарор транспорт тизимларини яратиш мавзулари ёритилмоқда.
Шунингдек, бугунги кунда Транспорт вазирлиги томонидан амалга оширилаётган “Тошкент – кам углеродли транспортга инвестицияларни жалб этишни жадаллаштириш” грант лойиҳаси Глобал экологик жамғарманинг (GEF) Мустақил баҳолаш офиси томонидан юқори баҳоланиб, энг яхши лойиҳа амалиёти сифатида эътироф этилди.