Ўзбекистон Республикаси Вазирлар Маҳкамаси ҳузуридаги Миграция агентлиги

Ўзбекистон Республикаси Вазирлар Маҳкамаси ҳузуридаги Миграция агентлиги томонидан 2025 йилнинг ўтган даврида 17 та давлатнинг 105 та ваколатли ташкилотлари билан миграция соҳасида музокаралар ташкил қилинди.

Қувайт, Қатар, Латвия, Литва, Россия, Венгрия, Сербия, Словения, Словакия, Хорватия, Грузия, Филиппин, Австрия, Болгария, Италия, Корея, Япония каби давлатлар шулар жумласидандир. Халқаро ҳамкорликни кенгайтириш мақсадида Европа ва Форс кўрфази давлатлари, Россия, Япония ва Корея давлатларининг ваколатли идоралари билан 100 дан ортиқ икки томонлама учрашувлар бўлиб ўтди.

Миграция соҳасида ҳалқаро ҳамкорликни кенгайтириш мақсадида Қувайт, Франция, Италия ва Швеция давлатлари билан миграция йўналишида ҳукуматлараро битимлар имзоланди.

Стратегик ва узоқ муддатли ҳамкор давлатлар сафидан Германия, Англия, Япония, Италия, Швеция, Болгария, Словения ўрин олди. Илк бор Македония, Австрия, Португалия, Нидерландия, Япония, Италия давлатларининг йирик компаниялари билан яқиндан ҳамкорлик ўрнатилди.

Шу каби келишувларнинг асосий йўналишларидан бири бу фуқароларни чет тиллари ва касбга ўқитиш ҳамда уларнинг касбий малакасини баҳолаш йўналишларида халқаро ҳамкорликни йўлга қўйишга қаратилган.

Бугунги кунда “Таълим+иш” тамойили асосида Германиянинг 4 та (Erfurt, KlettEDU, SBH, RekruitMed), Япониянинг 3 та (Onodera, Proud partners, Office Wise), Кореянинг 1 та (Hyundai), Болгариянинг 1 та (Scaffolding) халқаро ўқув марказлари 9 та ҳудудларда ташкил этилиб, 6 та касб ва хорижий тилга ўқитиш йўлга қўйилди.

Бугун ушбу йўналишдаги ишларнинг мантиқий давоми сифатида янада истиқболли келишувларга эришилди. Хусусан, Миграция агентлигининг Хоразм вилоят ҳудудий филиали “Тошкент Халқаро Сертификасиялаш Академияси”, Латвия Республикасининг Рига шаҳридаги СИА “Sertification sentre” ташкилоти, Хоразм вилояти олий таълим фан ва инновациялар бошқармаси ҳамда унинг тасарруфидаги Хива шаҳар политехникуми ва Хоразм Қурилиш коммунал хўжалиги техникуми ўртасидаги Ҳамкорлик келишуви имзоланди.

Ушбу келишувдан кўзланган асосий мақсад – вилоятдаги 2 та техникум базасида “Пайвандлаш”, “Сантехника ишлари устаси” ҳамда “Автокара хайдовчиси” йўналишларида фуқароларни ўқитиш, шунингдек касбий малакасини баҳолаш орқали халқаро сертификат (ИСО 9606-1) беришни йўлга қўйишдан иборат. Музокаралар давомида келгусида ҳамкорлик кўламини янада кенгайтириш ҳамда сертификатлаш йўналишларини талабга қараб босқичма-босқич ошириб боришга келишиб олинди.

Тадбир доирасида Миграция агентлигининг Хоразм вилоят ҳудудий филиали билан Урганч давлат университети ўртасида ҳам ўзаро ҳамкорлик келишуви имзоланди. Ушбу келишув хорижда вақтинча меҳнат фаолиятини амалга ошириш истагида бўлган фуқароларни иш берувчиларнинг талаблари ва хориж давлатлари стандартлари асосида хорижий тилларга ўқитиш орқали хавфсиз, тартибли ва қонуний меҳнат миграциясига жалб этишни кўзда тутади.

Икки томонлама музокаралар давомида университет билан дастлабки босқичда немис тилидан 10 ойлик ва корейс тилидан 6 ойлик тил курсларини университет базаида муассасанинг ўз маблағлари ҳисобидан ташкил қилишга келишиб олинди.

Юқоридаги келишувларнинг бош мақсади – фуқароларимизга янада қулайлик яратиш, уларни илғор хорижий стандартлар асосида етук мутахассис қилиб тайёрласаҳдан иборат.