Хусусий бандлик агентликларининг 2026 йил III чоракдаги рейтинг натижалари тасдиқланди
2026-10-21 17:00:00 / Янгиликлар
Миграция агентлиги директорининг 2025 йил 19 августдаги 116-сонли буйруғи билан тасдиқланган низомга мувофиқ, хусусий бандлик агентликлари фаолияти ҳар чоракда белгиланган индикаторлар асосида баҳоланади.
Мазкур тизим соҳада очиқлик ва шаффофликни таъминлаш, агентликлар фаолияти самарадорлигини баҳолаш ҳамда уларнинг иш натижалари ҳақида жамоатчиликка холис маълумот тақдим этишга қаратилган.
2026 йил 20 октябрдаги рейтингни баҳолаш комиссиясининг 3-сонли баённомасига мувофиқ, жами 47 та хусусий бандлик агентлигининг III чоракдаги рейтинг баллари тасдиқланди.
Рейтинг қандай мезонлар асосида шакллантирилди?
Баҳолаш Миграция агентлиги директорининг 116-сонли буйруғига 3-илова билан тасдиқланган 11 та индикатор асосида амалга оширилади.
Жумладан, қуйидаги кўрсаткичлар инобатга олинади:
Виза талаб қилинадиган ва талаб қилинмайдиган давлатларда фуқароларни ишга жойлаштириш натижалари ҳамда тегишли маълумотларни «Xorijda ish» платформасига киритиш;
Фуқаролар билан тузилган хизмат кўрсатиш шартномаларини электрон тизимда рўйхатдан ўтказиш;
Хорижий ҳамкорлар билан тузилган шартномаларни электрон тизимда қайд этиш;
Фуқароларни хорижга кетишдан олдин бориладиган давлат қонунчилиги ва у ерда бўлиш қоидалари бўйича тайёрлаш;
Миграция агентлиги томонидан сўралган маълумотларни тақдим этиш;
Расмий веб-сайт мавжудлиги ва унда тегишли маълумотларнинг жойлаштирилиши;
Фуқароларнинг норозилик мурожаатлари ва белгиланган талабларга риоя этилиши.
Баҳолаш тартибида ижобий кўрсаткичлар учун балл бериш билан бир қаторда, айрим талабларга риоя этилмаган ҳолатларда балларни камайтириш ҳам назарда тутилган.
Хусусан, фуқаролар билан тузилган шартномаларни электрон тизимда рўйхатдан ўтказмаслик, фаолиятга оид ўзгаришлар ҳақида ўз вақтида хабар бермаслик, фуқароларни жўнашдан олдин белгиланган тартибда тайёрламаслик ва норозилик мурожаатлари баҳолаш натижаларига таъсир қилади.
Рейтинг тоифалари
Тасдиқланган низомга кўра, хусусий бандлик агентликлари фаолияти тўрт тоифада баҳоланади:
|
Тўпланган балл |
Рейтинг тоифаси |
|
90–100 балл |
Намунали |
|
70–89 балл |
Яхши |
|
50–69 балл |
Қониқарли |
|
49 ва ундан паст |
Қониқарсиз |
2026 йил III чорак натижаларига кўра, 3 та агентлик «Яхши», 4 таси «Қониқарли», 40 таси «Қониқарсиз» тоифасига кирган. «Намунали» тоифасида агентлик қайд этилмаган.
Рейтинг натижалари нима учун эълон қилинмоқда?
Рейтинг баҳолаш натижаларининг очиқ эълон қилиниши фуқароларга хусусий бандлик агентликлари фаолияти тўғрисида қўшимча маълумот олиш, агентликларга эса ўз фаолиятини белгиланган мезонлар асосида таҳлил қилиш имконини беради.
Баҳолаш натижалари муайян ҳисобот давридаги фаолият кўрсаткичларини акс эттиради. Рейтинг тоифаси агентликнинг лицензия мақоми, хизматлар сифатига берилган кафолат ёки муайян ташкилотни танлаш бўйича тавсия ҳисобланмайди.
Низомга мувофиқ, баҳолаш натижаларининг ҳаққонийлиги ёки асослилиги юзасидан шубҳа туғдирувчи ҳолатлар аниқланса, улар махсус комиссия томонидан қайта кўриб чиқилиши мумкин.
Миграция агентлиги хусусий бандлик агентликлари фаолиятини белгиланган мезонлар асосида баҳолаш ва рейтинг натижаларини ҳар чоракда эълон қилиш амалиётини давом эттиради.
2026 йил III чоракда баҳоланган 47 та хусусий бандлик агентлигининг тўлиқ рейтинг натижалари қуйидаги жадвалда тақдим этилади.