Хорватияда Миграция агентлиги ваколатхонаси очилиши мумкин
2026-10-15 17:00:00 / Янгиликлар
Загреб | 15 октябрь, 2026 йил
Миграция агентлиги директори Муҳсинхўжа Абдураҳмонов Хорватия Ташқи ва Европа ишлари вазирлиги раҳбарияти билан музокаралар ўтказди.
Учрашувнинг муҳим натижаларидан бири — Хорватия томони Загребда Миграция агентлиги ваколатхонасини очиш ташаббусини қўллаб-қувватлади.
Эътиборлиси, мазкур ваколатхона нафақат Хорватиядаги юртдошларимизга ҳуқуқий ва амалий кўмак кўрсатиши, балки Словения ва Сербия билан ҳамкорликни мувофиқлаштирувчи марказ вазифасини ҳам бажариши мумкин.
Музокараларда яна бир долзарб масала — давлатлараро дастурлар асосида ишга қабул қилинган фуқароларнинг виза ҳужжатларини расмийлаштириш жараёнларини тезлаштириш имкониятлари кўриб чиқилди. Хорватия томони бу борада консуллик идоралари билан амалий ечимларни излашга тайёрлигини билдирди.
Томонлар эришилган келишувларни амалий босқичга ўтказиш бўйича ҳамкорликни давом эттиришга келишди.