Россияда ишлаш патентига керак ҳужжатларни Ўзбекистонда расмийлаштириш таклиф қилинди
2026-09-03 16:25:00 / ОАВ биз ҳақимизда
Меҳнат патентини олишда аввал тақдим этилган ҳужжатларни қайта сўрамаслик ва айрим жараёнларни рақамлаштириш ҳам таклиф этилди.
Миграция агентлиги Ўзбекистон фуқароларига Россияда ишлаш учун зарур ҳужжатларнинг бир қисмини Ўзбекистонда расмийлаштириш имконини яратишни таклиф қилди. Бу ҳақда агентлик матбуот хизмати RIA Новостига маълум қилди.
Ташаббус агентлик директори Беҳзод Мусаевнинг Россия идоралари вакиллари билан Москвада ўтказган музокараларида билдирилди.
Агентлик, шунингдек, фуқаро жўнаб кетишидан олдин унинг Россияга киришига чеклов бор-йўқлигини аниқлаш ва зарур ҳужжатларни дастлабки текширувдан ўтказиш имконини яратишни сўрамоқда.
Бунинг учун Россия ИИВ «Паспорт-виза хизмати»нинг Ўзбекистондаги ваколатхонаси ваколатларини кенгайтириш таклиф этилди. Бу фуқароларга Россияга кетишдан олдин айрим миграция масалаларини ҳал қилиш имконини бериши мумкин.
Томонлар Россиянинг ўзида миграция ҳужжатларини расмийлаштиришни соддалаштириш масаласини ҳам муҳокама қилди.
Жумладан, меҳнат патентини расмийлаштириш ёки қайта расмийлаштиришда аввал тақдим этилган ҳужжатларни такроран талаб қилмаслик ҳамда айрим тартиб-таомилларни рақамли форматга ўтказиш таклиф қилинди.
Агентликка кўра, бу чоралар Ўзбекистон фуқароларининг Россиядаги миграция марказларига ташрифлари сонини камайтириши мумкин.
Марказий банкнинг 2026 йил биринчи ярим йиллигига оид шарҳида келтирилган Миграция агентлиги маълумотларига кўра, Россияда 834,2 минг нафар Ўзбекистон фуқароси меҳнат қилмоқда.
Манбаа: sputniknews.uz