Хорижда мураккаб вазиятга тушиб қолган 2 888 нафар Ўзбекистон фуқароси Миграция агентлиги томонидан Ватанга қайтарилди
2026-08-12 10:00:00 / ОАВ биз ҳақимизда
Бу ҳақда 11 август куни Миграция агентлиги матбуот хизмати хабар берди.
Маълум қилинишича, мазкур кўрсаткич 2026 йилнинг етти ойи давомида Ватанга қайтарилган фуқаролар сонини ташкил этади. Уларни Ватанга қайтариш билан боғлиқ транспорт, тиббий, ташкилий ва бошқа зарур харажатлар учун Миграция жамғармасидан жами 9 млрд 936 млн сўм маблағ сарфланган.
Қайтарилган фуқароларнинг:
🔹 1 306 нафари — мураккаб молиявий аҳволда қолган шахслар;
🔹 518 нафари — болали аёллар;
🔹 1 022 нафари — болалар.
Шунингдек, 42 нафар фуқаро махсус тиббий ташиш орқали, яъни ётқизилган ҳолда Ватанга олиб келинган. Тиббий кузатув талаб этилган 15 нафар фуқаро Соғлиқни сақлаш вазирлиги шифокорлари назорати остида олиб келинган.
Хусусан, 2024 йилда ишлаш мақсадида Санкт-Петербургга кетган бир нафар ҳамюртимизнинг 2026 йил март ойидан бошлаб оиласи билан алоқаси узилган. Ўрганишлар натижасида унинг руҳий ҳолатида ўзгаришлар кузатилгани ва қаровсиз қолгани аниқланган.
У Миграция агентлиги кўмагида Санкт-Петербург — Тошкент рейси орқали Ватанга қайтарилган.