Мустақиллик ўз-ўзидан бўлган эмас. Унинг ортида халқимиз бошига тушган азоб-уқубатлар, йўқотилган ҳуқуқ ва эркинликлар, маънавият ва маърифат, аждодларимиздан тўкилган қонлар, бесамар умрлар кўмилган.

Мустақиллигимиз нишонланадиган айни дамларда ўтган кунларимизга бир назар солсак, қандай кунларни кўрганимиз ва қандай кунларга етганимиз кўз ўнгимизда ҳужжатли фильмлардек гавдаланади. Ва чуқур тин олиб, Мустақиллик учун, унинг неъматлари учун шукр қиламиз.

Мустақиллик байрами – мустақиллик кунини нишонлаш. мустақиллик байрами ҳар бир халқнинг азалий ва муқаддас орзуси. Шунинг учун мустақиллик байрами куни барча озод, эркин, тенглар ичида тенг бўлиб, жаҳон ҳамжамиятида ўз қонуний ўрнига эга бўлган халқлар томонидан энг улуғ миллий байрам сифатида нишонланади.

Ўзбекистон Республикаси 1991 йил 31 августда ўз давлат мустақиллигини қўлга киритди. 1 сентябрь Мустақиллик куни – мустақиллик байрами деб эълон қилинди.

Бугун у Ўзбекистонда энг муқаддас, энг улуғ миллий байрам.

Мустақиллик байрами Ўзбекистон Республикасининг 1992 йил 3 июлда қабул қилинган «Байрам кунлари хақида»ги қонунига ва Ўзбекистон Республикаси Олий Мажлисининг 1995 йил 21 декабрда қабул қилган Ўзбекистон Республикаси Меҳнат кодексининг 131-моддасига мувофиқ мамлакатимиз ҳудудида нишонланадиган байрам (дам олиш) кунлари қаторидан ўрин олди.

Мустақиллик байрами бутун халқимиз томонидан катта хурсандчилик ва кўтаринки руҳ билан кенг нишонланади. Айни шу куни эришилган ютуқлар сарҳисоб қилинади, келажак сари дадил одимлар белгиланади, давлатимизнинг олий мукофотлари топширилади.