Ўзбекистон Республикаси Вазирлар Маҳкамаси ҳузуридаги Миграция агентлиги

Муҳтарам вазирлар ва делегация раҳбарлари, қадрли ҳамкорлар, хонимлар ва жаноблар!

Баъзан давлатлар тақдирини чегаралар эмас, одамлар ҳаракати ўзгартиради. Ушбу залда дунёнинг 50 га яқин мамлакатидан ташриф буюрган 600 дан зиёд иштирокчилар жам бўлиб тургани — оддий халқаро конференция эмас. Бу ерда давлатлар, қарашлар ва тажрибалар бир нуқтада учрашмоқда. Чунки миграция масаласи аллақачон бир мамлакат чегарасидан чиқиб, умумий келажак масаласига айланган. 

Аввало, барчангизни қадимий ва меҳмондўст Тошкент шаҳрида самимий қутлайман. Шунингдек, мазкур анжуманни ҳамкорликда ташкил этган Халқаро миграция ташкилоти ҳамда Швейцария тараққиёт ва ҳамкорлик агентлигига самимий миннатдорлик билдираман. Тошкент азалдан йўллар кесишган шаҳар бўлган.

Бу ерда карвонлар тўхтаган. Халқлар учрашган. Ишонч шаклланган. Буюк Ипак йўли давридан буён ушбу замин одамларни яқинлаштиришга хизмат қилиб келмоқда. Айни пайтда айнан шу ерда замонамизнинг энг долзарб мавзуларидан бири муҳокама қилинмоқда. Чунки миграция — бу оддий ҳаракат эмас.

Одам ўз юртини осон тарк этмайди. Одамни йўлга чиқарадиган нарса эҳтиёж бўлиши мумкин.

Лекин уни олға етаклайдиган куч — умид. Кимдир фарзанди учун яхши таълим излайди. Кимдир ҳалол меҳнати билан оиласини таъминлашни истайди.  Яна кимдир ўз қобилиятига муносиб имконият қидиради. Шу сабабли миграция ҳақида гап кетганда статистика ортидаги ҳаётни унутмаслигимиз керак. Ҳисобот учун рақамлар етарли бўлиши мумкин. Аммо қарор қабул қилиш учун одам тақдири ҳис қилиниши керак. Шунинг учун ҳам миграция сиёсати марказида адолат, инсон қадри ва ишонч туриши шарт.

Дунё тез суръатларда ўзгармоқда. Технологиялар чегараларни қисқартирмоқда. Иқтисодиётлар бир-бирига яқинлашмоқда. Лекин бир ҳақиқат ўзгармайди: инсон қадри сақланмаган жойда барқарор тараққиёт бўлмайди. Шу боис ҳеч бир давлат бу масалани ёлғиз ҳал қила олмайди. Чунки миграция — бу фақат меҳнат бозори масаласи эмас. Бу ишонч, барқарорлик ва умумий масъулият масаласидир. Ўзбекистон учун ҳам ушбу йўналиш стратегик аҳамиятга эга.

Президентимиз Шавкат Мирзиёев раҳбарлигида мамлакатимизда профессионал таълим, тил ўқитиш, касбга тайёрлаш ва тартибли меҳнат миграцияси тизимини ривожлантириш бўйича кенг кўламли ишлар амалга оширилмоқда. Биз фуқароларимиз дунёнинг қаерида бўлмасин, меҳнати, билими ва масъулияти билан қадр топишини истаймиз.

Қадрли дўстлар!

Ўтган ҳафта Нью-Йорк шаҳрида, Бирлашган Миллатлар Ташкилоти минбарида миграция масалалари халқаро даражада муҳокама қилинди. Эндиликда ана шу мулоқот Тошкентда амалий мазмунда давом этмоқда. Бу ҳам Ўзбекистоннинг глобал жараёнлардаги иштироки ва очиқ мулоқот тарафдори эканининг ифодасидир. Мен бир фикрга қатъий ишонаман: инсонга фақат меҳнат кучи сифатида қаралган жойда ишонч йўқолади. Инсон қадри сақланган жойда эса тараққиёт бошланади..

Азиз меҳмонлар!

Сўзимни якунида бир фикрни айтмоқчиман: Чегаралар давлатларни ажратади. Ишонч эса уларни яқинлаштиради. Тошкентга ташриф буюриб, ушбу муҳим мулоқотнинг бир қисми бўлганингиз учун барчангизга самимий миннатдорлик билдираман. Ишонаманки, мазкур конференция янги ҳамкорликлар ва муҳим қарорлар учун мустаҳкам асос бўлади. Барчангизни конференция ишида фаол иштирок этишга чақираман.

Эътиборингиз учун раҳмат!