Kunduzgi stasionarlar: shifoxonalarga murojaatlar soni 19,1 foizga kamaydi
2024-07-16 10:05:00 / Yangiliklar
Ta'kidlash joizki, avvalari birlamchi bo'g'in muassasalaridagi kunduzgi shifoxonalardan etarlicha foydalanilmas edi. Ba'zi oilaviy poliklinikalarda kunduzgi stasionar uchun xona etishmasa, boshqalarida turli sabablar bilan shifo o'rinlari tashkil etilmagandi.
Bugungi kunga kelib, respublikamizdagi oilaviy shifokorlik punktlari, oilaviy va ko'p tarmoqli Markaziy poliklinikalardagi kunduzgi stasionarlarda 19,3 mingta kunduzgi shifo o'rni tashkil etilgan. Bunda imkoniyatlardan kelib chiqqan holda oilaviy shifokor punktlarida 6 tagacha, oilaviy va ko'p tarmoqli Markaziy poliklinikalarda 20 tagacha kunduzgi shifo o'rinlari yaratilgan. Ularda ishlaydigan tibbiyot xodimlari ish haqiga qo'shimcha ustama to'lanishi yo'lga qo'yildi.
Kunduzgi stasionarlarda tibbiy xizmatlar ko'rsatish vaqti 13:00 dan 20:00 gacha uzaytirilgani ularning ish faoliyatidagi asosiy yangiliklardan biri bo'ldi.
Qolaversa, xuddi shu yangi tizim orqali 558 ming nafar bemorga oilasidan ajralmagan holda davolanish imkoniyati yaratildi va natijada shifoxonalarga murojaatlar 19,1 foizga kamaydi.
Kunduzgi stasionarlarda o'zi kimlar davolanishi mumkin?
Bu muassasalarda davolanish uchun o'tkir, surunkali kasalliklarning remissiyasi yoki subremissiyasi davridagi, reabilitasiya va sog'lomlashtirish muolajalariga muhtoj bo'lgan bemorlar oila shifokori yoki tor soha mutaxassisi yo'llanmasi asosida yuboriladi.
U erda muolaja olayotganlar vrach va hamshiraning doimiy nazoratida bo'ladi. Bemorlarga kafolatlangan paket doirasida tegishli tibbiy yordam ko'rsatilib, dori vositalari bepul taqdim etiladi.
Masalan, bemorlar kunduzgi stasionarlarda tegishli laboratoriya va diagnostika tekshiruvlaridan o'tishi, fizioterapiya, infuzion terapiya, reabilitasion muolajalar kabi tibbiy xizmatlardan foydalanishi mumkin.
Bir so'z bilan aytganda, bugun birlamchi bo'g'indagi takomillashgan kunduzgi stasionarlar bemorlarning vaqti va mablag'ini tejab, ularga tunu kun sifatli tibbiy xizmat ko'rsatadigan o'ziga xos kichik shifoxona bo'lib xizmat qilmoqda.
Sog'liqni saqlash vazirligi
Matbuot xizmati.