O‘zbekiston Respublikasi Prezidentining

Qarori

2025 — 2030-yillarda bolalar saratoniga qarshi kurashish bo‘yicha O‘zbekiston Respublikasi milliy strategiyasini amalga oshirish chora-tadbirlari to‘g‘risida

 

O‘zbekiston Respublikasi Prezidentining 2023-yil 11-sentabrdagi “O‘zbekiston — 2030” strategiyasi to‘g‘risida”gi PF-158-son Farmoni bilan aholi salomatligini ta’minlash sohasida belgilangan vazifalarni, shuningdek, onkologik va onkogematologik kasalliklarga chalingan bolalarni profilaktika qilish, tashxislash, davolash va reabilitatsiya qilish tizimini tubdan takomillashtirishga, ularning hayot sifatini yaxshilashga, kasalliklarni erta aniqlash, kompleks terapiya qilish va xalqaro standartlarga muvofiq uzoq muddatli kuzatuv olib borish imkonini beradigan qulay, yuqori texnologik va innovatsion tibbiy infratuzilmani yaratishga, pediatriya xizmati hamda bolalar onkologiyasi, gematologiyasi va immunologiyasi xizmatining moddiy-texnika bazasini mustahkamlashga yo‘naltirilgan global va milliy strategik tashabbuslarni amalga oshirish maqsadida qaror qilaman:

I. Maqsadlar

1. Quyidagilar 2025 — 2030-yillarda O‘zbekistonda bolalar saratoniga qarshi kurashishning asosiy maqsadlari etib belgilansin:

(a) bolalar saratonini erta bosqichlarda aniqlash holatlari ulushini 65 foizgacha oshirish;

(b) onkologik va onkogematologik kasalliklarga chalingan bolalarning bir yillik yashovchanligini 34 foizdan 90 foizgacha, besh yillik yashovchanligini esa kamida 60 foizgacha oshirish;

(v) saraton kasalligiga chalingan bolalarni 100 foiz ixtisoslashtirilgan tibbiy yordam bilan qamrab olish;

(g) onkogematologik kasalliklarga tashxis qo‘yish muddatlarini 4 kungacha va onkologik kasalliklarga tashxis qo‘yish muddatlarini 14 kungacha qisqartirish;

(d) onkologik va onkogematologik kasalliklarni davolashni 10 kundan 20 kungacha bo‘lgan muddatda boshlash;

(e) birlamchi tibbiy-sanitariya yordami muassasalarida bolalar saratoni belgilarini aniqlash uchun sharoitlar yaratish;

(j) kadrlar salohiyatini oshirish, ustuvor tartibda hududlardagi tibbiyot muassasalarining moddiy-texnika bazasini mustahkamlash, bolalar saratoniga qarshi kurashishning barcha bo‘g‘inlarida biznes jarayonlarni raqamlashtirish.

II. Bolalar saratoniga qarshi kurashish bo‘yicha milliy strategiya

2. Xalqaro ekspertlar va Jahon sog‘liqni saqlash tashkiloti ishtirokida 2025 — 2030-yillarda bolalar saratoniga qarshi kurashish bo‘yicha O‘zbekiston Respublikasi milliy strategiyasi (keyingi o‘rinlarda — Strategiya) ishlab chiqilganligi ma’lumot uchun qabul qilinsin.

3. Ushbu Farmon bilan belgilangan maqsad va ustuvor vazifalarga erishish uchun quyidagilar tasdiqlansin:

(a) 2025 — 2026-yillarda bolalar saratoniga qarshi kurashish bo‘yicha O‘zbekiston Respublikasi milliy strategiyasini amalga oshirish bo‘yicha kompleks chora-tadbirlar dasturi 1-ilovaga muvofiq;

(b) 2025 — 2030-yillarda bolalar saratoniga qarshi kurashish bo‘yicha O‘zbekiston Respublikasi milliy strategiyasini amalga oshirishning maqsadli ko‘rsatkichlari 2-ilovaga muvofiq.

4. Belgilansinki, Strategiya Vazirlar Mahkamasi tomonidan tasdiqlanadigan ikki yillik chora-tadbirlar rejalari asosida amalga oshiriladi.

III. Ustuvor vazifalar

5. Quyidagilar Strategiyaning ustuvor vazifalari etib belgilansin:

(a) saraton (onkologik, onkogematologik) kasalliklarga chalingan bolalarning profilaktikasi, diagnostikasi, kasalliklarni erta aniqlash, davolash va parvarishlash tizimini quyidagilar orqali takomillashtirish:

(i) tibbiyot brigadasi xodimlarining saraton kasalliklariga shubhalarni aniqlash uchun so‘rovnoma, tibbiy ko‘rik va birlamchi skrining o‘tkazish bo‘yicha malakasini oshirish;

(ii) barcha tuman (shahar)larda saraton va boshqa kasalliklarni erta bosqichlarda tashxislash imkonini beruvchi zarur uskunalar bilan jihozlangan markaziy laboratoriyalar xizmatini rivojlantirish;

(iii) saratonga shubha qilingan bolalarni tezlashtirilgan holda tashxislash va davolash tizimini (“yashil” yo‘lak) joriy etish, bunda bolalar onkologiyasi, gematologiyasi va immunologiyasi xizmatining butun vertikali bo‘ylab bemorlarni yo‘naltirish reglamentini tasdiqlash va unga rioya qilishni nazarda tutish;

(iv) tibbiy ma’lumotlarni boshqarish jarayonlarini raqamlashtirish, tibbiyot xodimlarini o‘z faoliyatida axborot-kommunikatsiya texnologiyalarini qo‘llashga o‘qitish, shuningdek, sun’iy intellekt imkoniyatlaridan faol foydalanish hisobiga tashxislash va davolash usullarini takomillashtirish;

(b) quyidagilar hisobiga ko‘rsatilayotgan tibbiy yordam sifatini oshirish va o‘lim holatlarini kamaytirish:

(i) barcha darajalardagi saratonga qarshi kurashish muassasalari faoliyatiga innovatsion texnologiyalar va ilmiy-amaliy tadqiqotlar natijalarini joriy etish, shuningdek, hududlarning mutaxassis kadrlar bilan to‘ldirilishini ta’minlash hamda ularning malakasini uzluksiz oshirish va tayyorlash tizimini yaratish;

(ii) xalqaro maslahatchilar va hamkorlarning tavsiyalariga muvofiq xalqaro standartlar va davolash protokollarini joriy etish;

(iii) Bolalar onkologiyasi, gematologiyasi va immunologiyasi ilmiy-amaliy tibbiyot markazi (keyingi o‘rinlarda — Markaz), shuningdek, hududiy bolalar ko‘p tarmoqli tibbiyot markazlarining moddiy-texnika bazasini mustahkamlash orqali yuqori texnologik tibbiy yordam ko‘rsatish infratuzilmasini shakllantirish;

(iv) tuman (shahar) tibbiyot birlashmalarini zamonaviy uskunalar bilan jihozlash hamda dori vositalari bilan uzluksiz ta’minlash;

(v) saraton kasalligiga chalingan bolalar va ularning oilalari uchun palliativ yordam va xospis tizimini takomillashtirish hisobiga bemorlarning hayot sifatini yaxshilash;

(g) profilaktik tadbirlarni faollashtirish va aholining bolalar saratoni haqida xabardorligini oshirish.

IV. Strategiyani joriy etish loyihasi

6. Sog‘liqni saqlash vazirligining quyidagilarni nazarda tutuvchi Strategiyani joriy etish loyihasini (keyingi o‘rinlarda — Loyiha) 2025-2026-yillarda Samarqand shahri va Ishtixon tumanidagi tibbiyot muassasalari bazasida amalga oshirish hamda uni kelgusida zarur shart-sharoitlar yaratilishiga qarab mamlakatning boshqa hududlariga parallel ravishda kengaytirish bo‘yicha taklifiga rozilik berilsin:

(a) tibbiyot brigadasi xodimlarini saraton kasalliklariga birlamchi shubhalarni aniqlash bo‘yicha so‘rovnoma va tibbiy ko‘rik o‘tkazish hamda birlamchi skrining tartib-qoidalariga o‘qitish orqali tibbiyot xodimlarining onkologik va onkogematologik hushyorligini oshirish;

(b) bemorlarni yo‘naltirishning kasalliklarni tuman darajasida aniqlash va birlamchi tashxis qo‘yish, hududiy va respublika darajalarida tashxisni tasdiqlash va yuqori texnologik davolash, reabilitatsiya qilish va palliativ yordam ko‘rsatish tamoyili bo‘yicha ishlaydigan yangi tizimini joriy etish;

(v) kasalliklarni erta aniqlash va tashxis qo‘yish samaradorligini oshirish, shuningdek, bemorning yo‘naltirilishini nazorat qilish uchun tibbiyot xodimlarining bolalar bilan ishlash jarayonlarini raqamlashtirish va sun’iy intellekt texnologiyalarini joriy etish;

(g) tuman (shahar), viloyat va respublika darajasidagi tibbiyot muassasalari xodimlarini qayta tayyorlash va malakasini oshirish;

(d) bemor bolalarga ambulatoriya va statsionar darajada palliativ yordam ko‘rsatishni joriy etish.

V. Loyihani joriy etishning tashkiliy-texnik ta’minoti

7. Quyidagilar tasdiqlansin:

(a) Qoraqalpog‘iston Respublikasi va viloyatlar bolalar ko‘p tarmoqli tibbiyot markazlari uchun qo‘shimcha binolarni qurish rejasi 3-ilovaga muvofiq;

(b) Tuman (shahar) tibbiyot birlashmalariga qarashli tibbiyot muassasalarini va bolalar shifoxonalarini jihozlash uchun tibbiy asbob-uskunalar ro‘yxati 4-ilovaga muvofiq;

(v) Bolalar shifoxonalarini jihozlash uchun tibbiy asbob-uskunalar ro‘yxati 4a-ilovaga muvofiq.

8. Raqamli texnologiyalar vazirligi va “Davlat axborot tizimlarini yaratish va qo‘llab-quvvatlash bo‘yicha yagona integrator — “UZINFOCOM” MCHJ Sog‘liqni saqlash vazirligi bilan birgalikda:

(a) 2025-yil 1-iyulga qadar “Elektron sog‘liqni saqlash” axborot tizimida:

(i) onkologik va onkogematologik kasalliklarga chalingan bolalarni ro‘yxatga olish, tashxislash, davolash, dispanser kuzatuvi hamda yo‘naltirish jarayonlarini o‘z ichiga olgan bemorlarning raqamlashtirilgan marshrutini joriy etsin;

(ii) tibbiyot xodimlarini o‘qitish va foydalanuvchilar uchun qulay interfeys yaratish orqali shifokor qabuliga masofadan yozilish hamda onlayn konsultatsiyalar o‘tkazish imkoniyatini yaratsin;

(b) 2025-yil yakuniga qadar Loyihani amalga oshirish doirasida sun’iy intellekt texnologiyalarini joriy etishni ta’minlasin.

9. O‘zbekiston Respublikasi Prezidentining 2024-yil 21-maydagi “Onkologik, gematologik va immunologik kasalliklarga chalingan bolalarga tibbiy yordam ko‘rsatishni yanada takomillashtirish chora-tadbirlari to‘g‘risida”gi PQ-183-son qaroriga muvofiq, Vena tibbiyot universiteti (Avstriya) va “AME International” (Avstriya) kompaniyasi vakillaridan iborat konsorsium tomonidan quyidagilarni nazarda tutuvchi O‘zbekistonda bolalar onkologiyasi, gematologiyasi va immunologiyasi xizmatini takomillashtirish bo‘yicha master reja (keyingi o‘rinlarda — Master reja) ishlab chiqilganligi ma’lumot uchun qabul qilinsin:

(a) Markazda va bolalar onkologiyasi, gematologiyasi va immunologiyasi xizmatining vertikali bo‘ylab bolalarni yuqori samarali tashxislash, davolash, reabilitatsiya qilish va palliativ yordam ko‘rsatish bo‘yicha jahon standartlari, protokollari va tavsiyalarini joriy etish;

(b) bolalar onkologiyasi, gematologiyasi va immunologiyasi xizmatini boshqarish vertikalining samaradorligini oshirish, shu jumladan, kadrlar salohiyatini rivojlantirish, tibbiyot xodimlari uchun xorijiy stajirovkalar va boshqa ta’limga oid tadbirlarni tashkil etish;

(v) Markaz hududida Master rejada nazarda tutilgan obyektlarni, shu jumladan, simulyatsiya markazi joylashgan aseptik blok, laboratoriya-diagnostika hamda radiologiya bloki va nur terapiyasi bo‘limini, poliklinika va ma’muriy binoni loyihalashtirish, qurish, yangilash va jihozlash.

10. Markazga, istisno tariqasida, “AME International” kompaniyasi bilan to‘g‘ridan-to‘g‘ri muzokaralar o‘tkazish orqali kamida 50 foiz miqdorida avans to‘lovlarini amalga oshirish imkoniyati bilan 2025 — 2027-yillar davomida Master rejani boshqarish va amalga oshirish bo‘yicha EPC shartnoma tuzishga ruxsat berilsin.

11. Bolalar onkologiyasi, gematologiyasi va immunologiyasi xizmatining akademik, ilmiy va kadrlar salohiyatini rivojlantirish hamda mintaqa davlatlari o‘rtasida bolalar onkogematologiyasi bo‘yicha tajriba almashish maqsadida yetakchi Yevropa universitetlari klinikalari ko‘magida Markaz huzurida davlat muassasasi shaklida Bolalar saratoni bo‘yicha xalqaro akademik xab (keyingi o‘rinlarda — Akademik xab) tashkil etilsin.

12. Belgilansinki, Akademik xab ilmiy-ta’lim muassasasi hisoblanadi hamda unga quyidagi asosiy vazifalar yuklatiladi:

(a) xalqaro sertifikatlashtirish va uzluksiz tibbiy ta’lim tizimi bo‘yicha ballar to‘plash standartlariga mos keladigan xalqaro ta’lim dasturlarini joriy etish;

(b) qayta tayyorlash va malaka oshirishni tashkil etish orqali bolalar onkologiyasi, gematologiyasi va immunologiyasi xizmati uchun malakali tibbiy va ilmiy kadrlarni tayyorlash;

(v) bolalarda onkologik va onkogematologik kasalliklarni erta aniqlash, tashxislash va davolashning zamonaviy usullarini ishlab chiqish va joriy etishga qaratilgan bolalar onkologiyasi, gematologiyasi va immunologiyasi sohasida ilg‘or klinik va amaliy tadqiqotlarni tatbiq qilish va innovatsiyalarni joriy etish;

(g) tibbiyot muassasalarining bolalar onkologiyasi, gematologiyasi va immunologiyasi sohasidagi ilmiy salohiyatni rivojlantirish va mustahkamlash, shuningdek, xalqaro hamkorlikni hamda global akademik va tadqiqot tarmoqlariga integratsiyalashuvni rivojlantirish;

(d) yetakchi xorijiy farmatsevtika kompaniyalari va tibbiyot markazlari bilan birgalikda Sog‘liqni saqlash vazirligining talablariga muvofiq belgilangan tartibda istiqbolli dori vositalari va davolash metodikalarining klinik sinovlarini o‘tkazish;

(e) strategik rejalashtirish va profilaktik chora-tadbirlar ishlab chiqish uchun bolalar saratoni bilan kasallanishning epidemiologik tendensiyalarini tahlil qilish va prognozlash.

13. O‘zbekiston Respublikasi Prezidentining 2024-yil 21-maydagi “Onkologik, gematologik va immunologik kasalliklarga chalingan bolalarga tibbiy yordam ko‘rsatishni yanada takomillashtirish chora-tadbirlari to‘g‘risida”gi PQ-183-son qarori bilan tasdiqlangan Bolalar onkologiyasi, gematologiyasi va immunologiyasi ilmiy-amaliy tibbiyot markazining kuzatuv kengashiga:

(a) Akademik xabning ta’sis hujjatlarini, xarajatlar va daromadlar smetasini hamda tuzilmasini tasdiqlash;

(b) Akademik xabda tahsil olish uchun budjet mablag‘lari hisobidan grant kvotalarini belgilash;

(v) xorijiy tinglovchilar uchun o‘qitish xarajatlari miqdorini belgilash huquqi berilsin.

14. Belgilab qo‘yilsinki, 2028-yil 1-yanvarga qadar respublikada ishlab chiqarilmaydigan va belgilangan tartibda tasdiqlangan ro‘yxatlar bo‘yicha Akademik xab uchun olib kiriladigan o‘quv va ilmiy laboratoriya jihozlari, kompyuter texnikasi, multimedia mahsulotlari, o‘quv va ilmiy-metodik adabiyotlar, inventar va moddiy-texnika resurslari bojxona to‘lovlaridan (qo‘shilgan qiymat solig‘i va bojxona rasmiylashtiruvi yig‘imlaridan tashqari) ozod qilinadi.

15. Vazirlar Mahkamasi ikki hafta muddatda Akademik xab faoliyatini tashkil etish va joylashtirish bo‘yicha qaror qabul qilsin hamda uni moliyalashtirish manbai etib O‘zbekiston Respublikasining respublika budjeti mablag‘lari belgilansin.

VI. Moliyaviy ta’minot

16. Iqtisodiyot va moliya vazirligi Markazning asoslangan hisob-kitoblari asosida 2025-yilda onkologik, onkogematologik va immunologik kasalliklarga chalingan bolalarni dori vositalari bilan ta’minlash uchun qo‘shimcha mablag‘lar ajratsin, 2026-yildan boshlab Davlat budjeti parametrlarini shakllantirishda zarur mablag‘larni nazarda tutsin.

17. Sog‘liqni saqlash vazirligi Iqtisodiyot va moliya vazirligi bilan birgalikda Strategiyani amalga oshirish doirasida zarur moddiy-texnik bazaning tayyorligi va kadrlar ta’minotidan kelib chiqib, tibbiyot muassasalarining shtat normativlari qayta ko‘rib chiqilishini hamda zarur mutaxassislar lavozimlari kiritilishini ta’minlasin.

18. Belgilab qo‘yilsinki:

(a) mazkur qaror ijrosini ta’minlash bilan bog‘liq xarajatlar 2025-yilda Davlat budjetidan qo‘shimcha ajratiladigan mablag‘lar hisobidan moliyalashtiriladi, 2026-yildan boshlab Davlat budjeti parametrlarida nazarda tutiladi;

(b) hududiy bolalar ko‘p tarmoqli tibbiyot markazlari uchun qo‘shimcha binolarni qurishni moliyalashtirish 2025 — 2027-yillarda O‘zbekiston Respublikasining ijtimoiy va ishlab chiqarish infratuzilmasini rivojlantirish dasturi mablag‘lari hisobidan amalga oshiriladi;

(v) Tibbiyot muassasalarini jihozlash xalqaro moliya institutlari va “KfW” banki (Germaniya Federativ Respublikasi) mablag‘lari, Sog‘liqni saqlash vazirligiga ajratilgan mablag‘lar, shuningdek, O‘zbekiston Respublikasi benefitsiar bo‘lgan xalqaro kelishuvlar doirasida amalga oshiriladi;

(g) Akademik xabni yaratish va jihozlash xalqaro moliya institutlari va texnik ko‘mak mablag‘lari hisobidan amalga oshiriladi.

19. Investitsiyalar, sanoat va savdo vazirligi Iqtisodiyot va moliya vazirligi hamda Sog‘liqni saqlash vazirligi bilan birgalikda ikki oy muddatda Avstriya hukumati va Yevropa Ittifoqi, xalqaro moliya institutlari va xorijiy hukumat moliya tashkilotlari mablag‘lari, shu jumladan, Islom taraqqiyot bankining texnik ko‘mak va imtiyozli kredit mablag‘larini Master rejani boshqarish va amalga oshirish loyihasini birgalikda moliyalashtirish, shuningdek, Akademik xabni yaratish va jihozlash loyihasini amalga oshirish uchun jalb qilsin.

VII. Qaror ijrosini tashkil etish, ta’minlash va nazorat

20. Sog‘liqni saqlash vazirligi bir hafta muddatda Strategiyani o‘zining rasmiy veb-saytida joylashtirsin.

21. Vazirlar Mahkamasiga Loyiha amalga oshirilishiga va boshqa hududlarda bosqichma-bosqich joriy etilishiga qarab Strategiya parametrlariga, shuningdek, qurilish-montaj ishlari va tibbiyot muassasalarini jihozlash dasturlariga tuzatishlar kiritish huquqi berilsin.

22. 2025 — 2030-yillarda bolalar saratoniga qarshi kurashish bo‘yicha O‘zbekiston Respublikasi milliy strategiyasi chora-tadbirlarini amalga oshirish bo‘yicha ishchi guruh (keyingi o‘rinlarda — Ishchi guruh) 5-ilovaga muvofiq tarkibda tuzilsin, uning asosiy vazifalari etib normativ-huquqiy hujjatlar loyihalarini sifatli ishlab chiqish, shuningdek, Strategiyani amalga oshirishga ko‘maklashish belgilansin.

23. Qurilish va uy-joy kommunal xo‘jaligi vazirligi Markaz bilan kelishgan holda ikki oy muddatda xalqaro standartlarga ko‘ra bolalar onkogematologiyasi bo‘linmalari uchun 30 — 80 o‘ringa mo‘ljallangan binolarning (zarur hollarda, nur diagnostikasi va terapiyasi uchun binolar bilan birga) namunaviy loyihalarini ishlab chiqsin.

24. Qoraqalpog‘iston Respublikasi Vazirlar Kengashi, viloyatlar hokimliklari:

(a) bolalar onkogematologiyasi bo‘linmalari bloklari binolarini qurishda tasdiqlangan namunaviy loyihalarga qat’iy rioya etilishi, yer uchastkalari ajratilishi va tayyorlanishi, zarur muhandislik kommunikatsiyalari olib borilishini ta’minlasin;

(b) Strategiya va uni amalga oshirish bo‘yicha kompleks chora-tadbirlar dasturida nazarda tutilgan tadbirlarning o‘z vaqtida sifatli ijro etilishini ta’minlasin.

25. Sog‘liqni saqlash vazirligi quyidagilarni nazarda tutuvchi normativ-huquqiy hujjatlar loyihasini Vazirlar Mahkamasiga kiritsin:

(a) Markaz bilan birgalikda va xalqaro hamda mahalliy ekspertlarni jalb qilgan holda 2025-yil 1-avgustga qadar Bolalar saratoniga qarshi kurashishning 2026 — 2035-yillarga mo‘ljallangan milliy rejasini;

(b) ikki oy muddatda Kam uchraydigan (orfan) va boshqa irsiy-genetik kasalliklarga chalingan bolalarga tibbiy va ijtimoiy yordam ko‘rsatishni tashkil etish bo‘yicha 2025 — 2030-yillarga mo‘ljallangan chora-tadbirlar dasturini;

(v) 2025-yil yakuniga qadar Ekologiya, atrof-muhitni muhofaza qilish va iqlim o‘zgarishi vazirligi, Maktabgacha va maktab ta’limi vazirligi, Qishloq xo‘jaligi vazirligi, O‘zbekiston mahallalari uyushmasi bilan birgalikda onkologik va gematologik kasalliklarni o‘z ichiga olgan yuqumli bo‘lmagan kasalliklarga qarshi kurashish bo‘yicha profilaktik chora-tadbirlar dasturini.

26. Oliy Majlis palatalariga Oliy Majlis Senati va Qonunchilik palatasi, xalq deputatlari mahalliy kengashlari majlislarida tegishli davlat organlari rahbarlarining mazkur qarorni amalga oshirish doirasida qilingan ishlari to‘g‘risidagi hisobotlarini muntazam eshitib borishni tashkil etish tavsiya etilsin.

27. O‘zbekiston Respublikasi Prezidentining 2024-yil 21-maydagi “Onkologik, gematologik va immunologik kasalliklarga chalingan bolalarga tibbiy yordam ko‘rsatishni yanada takomillashtirish chora-tadbirlari to‘g‘risida”gi PQ-183-son qaroriga 6-ilovaga muvofiq o‘zgartirish va qo‘shimchalar kiritilsin.

28. Sog‘liqni saqlash vazirligi O‘zbekiston Milliy axborot agentligi va O‘zbekiston Milliy teleradiokompaniyasi bilan birgalikda ommaviy axborot vositalarida mazkur qarorning maqsad va vazifalari, shuningdek, Strategiyaning amalga oshirilishi va maqsadli ko‘rsatkichlariga erishilishining borishi keng yoritilishini ta’minlasin.

29. Mazkur qarorning samarali ijrosini tashkil etish uchun shaxsiy javobgarlik sog‘liqni saqlash vaziri A.A. Xudayarov zimmasiga yuklansin.

30. Qaror ijrosini muhokama qilib borish, uning ijrosi uchun mas’ul bo‘lgan tashkilotlar faoliyatini muvofiqlashtirish va nazorat qilish O‘zbekiston Respublikasi Bosh vaziri A.N. Aripov va O‘zbekiston Respublikasi Prezidenti Administratsiyasining Ijtimoiy rivojlanish departamenti rahbari O.K. Abduraxmanov zimmasiga yuklansin.

O‘zbekiston Respublikasi Prezidenti Sh. MIRZIYOYEV

Toshkent sh.,

2025-yil 19-may,

PQ-186-son

Manba:  Lex.uz