2024 yil mamlakatimizda "tibbiyot sohasida transformasiya yili" bo'ldi. Xususan, bu sohadagi sifat o'zgarishlari eng olis va chekka hududlarda yashovchilar hayotida ham aks etishi uchun malakali tibbiy xizmatni aholiga yanada yaqinlashtirish choralari Ko'rildi. 

Birlamchi tibbiy yordam
Poyoniga etgan 2024 yilda tibbiyotning birlamchi bo'g'inida yangi o'nga yaqin turdagi skrining tekshiruvlari yo'lga qo'yildi. Tizimda amalga oshirilayotgan transformasiya jarayonlari yangi bosqichga ko'tarilib, tibbiyotni xalqqa yanada yaqinlashtirish choralari Ko'rildi. 
Birlamchi tibbiy-sanitariya muassasalari — ayni paytda bu bo'g'inda 1 264 ta oilaviy shifokorlik punkti, 1 084 ta oilaviy poliklinika, 209 ta ko'p tarmoqli Markaziy poliklinika va ana shu muassasalarning 1 957 ta filiali faoliyat yuritmoqda.
So'nggi besh yilda aholiga tibbiy yordamni yanada yaqinlashtirish maqsadida oilaviy shifokorlik punktlari, oilaviy poliklinikalar, mahalla tibbiy punktlari tashkil etilib, ularning soni 4 600 dan ortdi.
Qishloqlarda joylashgan 820 ta oilaviy poliklinika yangi zamonaviy uzi, EKG apparatlari, stomatologik uskunalar kabi 11 turdagi tibbiy jihozlar bilan ta'minlandi.
Yil boshida tibbiy xatlovda aniqlangan 8,5 mln nafar (25 foiz) bemor sog'lomlashtirildi.
Samarasiz tibbiy ko'riklar o'rniga skrining tekshiruvlari joriy qilindi.
Yangicha yondashuv joriy etilishi natijasida ko'krak bezi saratonini erta bosqichlarda aniqlash 28,5 foizga, bachadon bo'yni saratonini aniqlash 10,5 foizga oshdi. 

"103" xizmati
Keyingi yillarda "103" xizmati faoliyatini takomillashtirish, soha amaliyotiga eng so'nggi ilmiy-texnik vositalar va axborot-kommunikasiya texnologiyalarini joriy etishga alohida e'tibor qaratilyapti.
Respublika tez tibbiy yordam markazining mamlakatimiz bo'ylab 2 800 dan ortiq tibbiy yordam brigadasi aholidan bo'ladigan chaqiriqlar uchun doimiy shay holda.
Bundan tashqari, 2017 yil 818 ta tez tibbiy yordam shaxobchasi faoliyat ko'rsatgan bo'lsa, 2024 yil ular soni 1 766 taga ko'paydi.
Tez tibbiy yordam brigadalari soni ushbu davrda 1 648 tadan 2 853 taga etdi. "Tez yordam"ning xizmat ko'rsatish radiusi shaharlarda 25-30 kilometrdan 9-12 kilometrga qisqardi.
Oxirgi yillarda tizimda uzoq yillar foydalanib kelingan, eskirib qolgan va zarur tibbiy jihozlar bilan ta'minlanmagan avtotransport vositalarining 80 foizi yangilanib, 2 224 ta eng zamonaviy avtomashinalar foydalanishga topshirildi. 2017 yilda atigi 24 ta bo'lgan reanimobillar soni 2024 yilning ayni davriga kelib, 510 taga etkazildi. Sohaga 1 000 dona zamonaviy Volkswagen Caddy rusumli avtomobillar etkazib berildi va tizimdagi barcha avtotransport vositalari GPS-treker bilan ta'minlandi.
Bitta chaqiriqqa dori-darmon uchun ajratilayotgan mablag'lar miqdori 16 baravarga, dori-darmon turlari esa 20 tadan 45 tagacha oshirildi.
"103" xizmati faoliyatini takomillashtirishda Toshkent shahar tajribasi alohida o'rin tutadi. Shundan kelib chiqib, barcha hududiy filiallarda tez tibbiy yordam bo'yicha elektron avtomatlashtirilgan boshqaruv tizimi joriy qilindi.

Ixtisoslashtirilgan tibbiy yordam
Bir paytlar ilg'or xorijiy mamlakatlar, keyinchalik asosan poytaxtda bajarilgan yuqori texnologik operasiyalar, innovasion diagnostika usullari endilikda hududlarda ham bosqichma-bosqich joriy etilyapti.
Xususan, so'nggi yillarda ixtisoslashtirilgan tibbiyot markazlarida qo'llanilayotgan diagnostika usullari 70 tadan qariyb 550 taga, davolash usullari 60 tadan 800 taga ko'paydi. Hududlarda yuqori texnologik operasiyalar ulushi 61 foizga etkazildi. 
Ixtisoslashtirilgan tibbiyot markazlari va ularning filiallarida har yili o'rtacha 100 ming nafar imtiyozli toifaga mansub bemorlar elektron order asosida davolanmoqda. 
Bunday yutuqlarning munosib e'tirofi sifatida 7 ta ixtisoslashtirilgan tibbiyot markazi xalqaro akkreditasiyadan o'tdi. 2024 yilning o'zida 7 ta ixtisoslashtirilgan markazlarimiz xalqaro sifat sertifikatlariga ega bo'ldilar. Bular kattalar va bolalar milliy tibbiyot markazlari, respublika ixtisoslashtirilgan xirurgiya, ona va bola salomatligi, endokrinologiya, pediatriya hamda dermatovenerologiya va kosmetologiya tibbiyot markazlari.

Onalar va bolalar salomatligi 
Onalar va bolalar salomatligi har bir mamlakatning iqtisodiy-ijtimoiy rivojlanish indikatori hisoblanadi. O'zbekistonda ham keyingi yillarda bu soha mutlaqo yangicha yondashuvlar asosida isloh qilinmoqda.
Onalik va bolalikni muhofaza qilish yo'nalishida 17 mln. nafardan ortiq ayollarga (9,3 mln. nafardan ziyod tug'ish yoshidagi ayollar) 22,3 mingta o'ringa ega 230 ta tug'ruq muassasalari va 18 yoshgacha bo'lgan (12,9 mln. nafardan ortiq bolalar) bolalarga 28,0 mingta o'ringa ega 245 ta pediatriya muassasalari aholiga xizmat qilib keldi.
Shu bilan birga, birlamchi tibbiy-sanitariya muassasalarida "ayollar maslahatxona"lari, tuman (shahar) ko'p tarmoqli Markaziy poliklinikalarda "prenatal skrining xona"lari, "onko-nazorat xona" lari faoliyat yuritayapti.
2024 yilda Markaziy ko'p tarmoqli tuman va shahar poliklinikalari "prenatal skrining xona"laridan jami 726 017 nafar (95,6%) homiladorlar prenatal ultratovush tekshiruvidan o'tkazilib, 14 821 nafarida (2,0%) homilada tug'ma nuqsoni va akusherlik patologiyasi aniqlandi. Aniqlanganlarning 13 335 nafarida (89,9%) homiladorlik to'xtatilgan.
900 ming nafar chaqaloqlarni tug'ma gipotireoz, fenilketonuriya kasalliklarini aniqlash bo'yicha 2024 yilda neonatal skriningdan o'tkazish yuzasidan Sog'liqni saqlash vazirligi va "Pribory oy" (Finlyandiya) kompaniyasi o'rtasida tuzilgan shartnoma asosida 579 754,5 AQSh dollari qiymatidagi reaktivlar, reagentlar va sarflovchi materiallari hududiy "ona va bola skriningi" bo'limlariga joriy yilning mart oyida etkazib berilgan. Chaqaloqlarni neonatal skrining tekshiruvlari joriy yilning 1 aprel kunidan boshlangin bo'lib, shu kunga qadar 464 801 nafar chaqaloqlarda tug'ma gipotireoz, fenilketonuriya kasalliklariga neonatal skrining tekshiruvlari o'tkazildi va 4 457 nafar chaqaloqlarda tug'ma gipoteriozga va 1 718 nafar chaqaloqlarda fenilketonuriyaga havf guruhi aniqlangan.
2024 yilda joylardagi birlamchi tibbiy-sanitariya yordami muassasalarida tasdiqlangan tarmoq reja asosida 9,3 mln nafardan ziyod tug'ish yoshidagi ayollarning 8,8 mln nafari (95,3%) tibbiy ko'rikdan o'tkazildi. Ularning 3,1 mln nafarida (35,3%) ekstragenital kasalliklar aniqlandi. Ularning 2,6 mln (84,9%) nafari sog'lomlashtirilgan. Shundan 2,0 mln nafari (78,4%) ambulator va 217,6 ming nafari (8,2%) stasionar sharoitda sog'lomlashtirildi. 
2023 yil 1 iyuldan oilaviy shifokor punktlari va tuman (shahar) ko'p tarmoqli Markaziy poliklinikalari "tibbiy brigadalari" tarkibiga 8 500 nafar doyalarning faoliyati yo'lga qo'yildi. Ularni reja asosida "tibbiy brigada doyasi" ko'nikmalari bo'yicha o'qitish maqsadida hududlarda faoliyat yuritayotgan 8 500 nafar doyalar ro'yxati shakllantirildi.

Tibbiy ta'lim 
So'nggi yillarda yurtimizda tibbiyot yo'nalishida ilg'or ta'lim standartlari asosida yuqori bilimga ega mutaxassislar tayyorlashga alohida e'tibor qaratilmoqda.
Hozir mamlakatimizdagi 11 ta tibbiyot davlat tibbiyot oliy ta'lim muassasasi hamda 14 ta nodavlat oliy o'quv yurtida soha uchun mutaxassislar tayyorlanyapti. Shuningdek, Rossiya, Koreya, Germaniya, Belarus, Turkiya, Ukraina, Hindiston, Italiya, Xitoy, Polsha davlatlarining 25 ta universiteti bilan 12 ta bakalavriat yo'nalishi, 14 ta magistratura va 11 ta klinik ordinatura mutaxassisligi bo'yicha xalqaro qo'shma ta'lim dasturlariga muvofiq 1 517 nafar talaba tahsil olmoqda.
Shuningdek, tibbiyot oliy o'quv yurtlarimiz talabalari orasida Rossiya, AQSh, Hindiston, Pokiston,Turkmaniston, Qozog'iston kabi 20 dan ziyod davlatlardan kelib bilim olayotgan 6 ming nafarga yaqin yoshlar ham bor.
Bundan tashqari, davlatimiz rahbarining tegishli qaroriga muvofiq tibbiyot kollejlari negizida tashkil etilgan 74 ta Abu Ali ibn Sino nomidagi jamoat salomatligi texnikumida 7 ta yo'nalish bo'yicha o'rta tibbiyot xodimlari tayyorlanyapti. O'z navbatida, Chilonzor Abu Ali ibn Sino nomidagi jamoat salomatligi texnikumi negizida hamshiralar akademiyasi tashkil etildi. Mazkur muassasa qoshida Turkiyaning sog'liq bilimlari universiteti fakulteti ochildi.
Muhimi, ana shu sohadagi yutuqlarimiz xalqaro miqyosda ham tan olinyapti, e'tirof etilmoqda.
Chunonchi, Toshkent tibbiyot akademiyasining bakalavriat, magistratura, klinik ordinatura va malaka oshirish mutaxassisliklari bo'yicha jami 20 ga yaqin ta'lim dasturi ta'lim sifatini ta'minlash bo'yicha mustaqil xalqaro akkreditasiya va reyting agentligi (IAAR) tomonidan xalqaro akkreditasiyadan o'tkazildi va maxsus sertifikatga ega bo'ldi.

Moliyalashtirish
Davlat byudjetidan sog'liqni saqlash tizimiga 2023 yilda 29 trln so'm, 2024 yilda 33,4 trln so'm ajratilgan. 2025 yilda esa 41,3 trln so'm ajratilishi belgilanmoqda.
2024 yilning o'zida 147 ta sog'liqni saqlash ob'ektlaridagi qurilish, ta'mirlash ishlari uchun 1,3 trln so'm ajratilgan. 
Joriy yilda 173,4 mlrd so'mga Respublika ixtisoslashtirilgan onkologiya va radiologiya ilmiy-amaliy tibbiyot markazi uchun yangi bino qurib bitkazilib, 80 mln dollarga jihozlandi. 
2024 yilda 441 ta muassasalarga 160 mln. dollarlik 1 246 turdagi 16 659 dona tibbiy jihozlar etkazib berildi.

Xorijiy investisiyalar
2024 yil yakuni bilan 293,1 mln dollar yillik reja ko'rsatkichidan 253,4 mln dollarlik xorijiy investisiyalar o'zlashtirilib, reja 86,5% bajarildi. 
Xalqaro moliya institutlarining 9 ta loyihada o'zlashtirish ishlari davom etmoqda:  
kattalar loyihasi 6,0 mln dollar ("EDCF", prognoz -33%); 
hududiy muassasalarni jihozlash loyihasi 26,1 mln dollar ("EDCF", prognoz -1,6%); 
urologiya va nefrologiya loyihasi 3,9 mln dollar (Quvayt fondi, prognoz - 83%); 
Milliy referens loyihasi 4,2 mln dollar ("KfW" banki, prognoz-10%).

Davlat-xususiy sheriklik
Shuningdek, DXSH 5 ta loyihalar amalga oshirilmoqda:
Nurli terapiya markazi — 5 mln dollar (prognoz-0%);
Toshkent shahar 5-son shifoxonasida reabilitasiya markazi — 4,9 mln doll (prognoz-10%);
Respublika urologiya markazi — 5 mln doll (prognoz-0%);
Farg'onada 750 o'rinli shifoxona — 27 mln doll (prognoz-0%);
Andijon va Buxoroda tibbiyot markazlari — 3 mln doll (prognoz-0%).

Raqamlashtirish
2024 yilda tibbiyot muasssalari 14 638 ta kompyuter va 4 200 dan ortiq raqamlashtirish qurilmalari bilan ta'minlandi.
Axborot xavfsizligini ta'minlash uchun vaziyatlar markazi tashkil etildi; 52 foiz axborot tizimlari o'zaro integrasiya qilindi.
Lokal tarmoq va server qurilmalarini montaj ishlarini amalga oshirishda ichki mehnat resurslaridan foydalanish natijasida 23,5 mlrd so'm mablag'tejab qolindi.
Yaroqsiz deb foydalanishdan chiqarilgan 6 224 ta kompyuter, 105 ta server va 4 256 ta printer qurilmalari ta'mirlanib, foydalanishga qaytarildi. Natijada 60,5 mlrd so'm oshiqcha mablag'sarflanishining oldi olindi.
O'zida 6 ta tizimni ("elektron poliklinika", "elektron shifoxona", "elektron resept", "elektron tibbiy karta", "laboratoriya", "patronaj skrining", "bemor") birlashtirgan "D-MED" axborot tizimi Qoraqalpog'iston Respublikasi, Toshkent shahri va Sirdaryo, Xorazm, Buxoro viloyatida joriy etildi.
109 ming nafar (21 foiz) tibbiyot xodimlarining axborot-kommunikasiya texnologiyalari yo'nalishida savodxonligi oshirildi. 
Raqamlashtirish bo'yicha o'rinbosarlarini oylik maoshi 200 foizga (oylik 16,5 mln so'mga), 209 ta tuman TTBning raqamlashtirishga mas'ul mutaxassislar maoshi 120 foizga (7,1 mln so'm) oshirildi.

Xususiy tibbiyot
Keyingi yillarda yurtimizda nodavlat tibbiyot muassasalari faoliyatini har tomonlama qo'llab-quvvatlash va rivojlantirish borasida keng ko'lamli ishlar amalga oshirilyapti.
Natijada 2017 yilda xususiy shifoxonalar soni qariyb 3,5 mingtani tashkil etgan bo'lsa, bugunga kelib ularning soni 9 mingdan ortdi. Tibbiyotning nodavlat sektorida ixtisoslik turlari 50 tadan 225 taga oshdi.
Ta'kidlash lozimki, ayni paytda yurtimizdagi barcha tibbiyot muassasalarida tashkil etilgan o'rin-joylarning 35 foizi xususiy sektor ulushiga to'g'ri kelmoqda. Ya'ni so'nggi yillarda nodavlat tibbiyot klinikalarida stasionar shifo o'rinlari soni sezilarli darajada ortib, 2024 yilda 42 744 tani tashkil etyapti.
Shuningdek, xususiy shifoxonalarning tibbiyot ixtisosliklari bo'yicha lisenziya olishiga imkon yaratildi. 
2 308 ta ambulator va 421 ta stasionar sharoitda faoliyat olib boradigan yangi xususiy shifoxonalar tashkil etildi. 
3 704 ta mavjud nodavlat klinikalar yangi tibbiy ixtisoslik hisobiga o'z faoliyatlarini kengaytirdi.
Shuningdek, xususiy tibbiyot muassasalarining barchasida ambulator, 1 532 tasida stasionar xizmatlari tashkil etilib, ular tomonidan ko'rsatilayotgan tibbiy xizmat turlari 726 tadan 2 251 taga oshdi. 
Albatta bunday ijobiy o'zgarishlar tufayli bugungi kunda sog'liqni saqlash tizimida nodavlat tibbiyotning ulushi 30 foizga etdi.
Jumladan, laboratoriya xizmatlarining 40 foizi, oftalmologiya va operativ oftalmologiyaning 60 foizi, LOR va endoskopik lorning 70 foizi va stomatologik tashxis hamda muolajalarning 91 foizi aynan xususiy klinikalar tomonidan ko'rsatilyapti. 
Yaqin kelajakda mazkur yo'nalishda yangi nodavlat tibbiyot muassasalarini tashkil etishda xalqaro standartlarni joriy etish; xususiy sektorda tibbiy xizmatlar sifatini oshirish, "xavfsiz tibbiyot" printsipini amaliyotga tatbiq qilish; tibbiy xizmatlar iste'molchilarining huquqlarini ishonchli himoya qilish hamda sohada sifat ko'rsatkichlarini yanada oshirish ko'zda tutilgan. 

Tibbiy xizmatlar sifatini jahon standartlari darajasiga olib chiqish
Yurtimizda aholiga ko'rsatilayotgan tibbiy xizmatlar sifatini jahon standartlari darajasiga olib chiqish — eng asosiy talablardan biri. Buning uchun esa, birinchi navbatda, xalqaro tajribani chuqur o'rganish va amaliyotga samarali tatbiq etish talab qilinadi. 
Ana shu ehtiyojdan kelib chiqib, Vazirlar Mahkamasining tegishli qaroriga ko'ra, Sog'liqni saqlash vazirligi tomonidan turkiyalik mutaxassislar guruhi jalb etilgan.
Ular mahalliy mutaxassislar bilan hamkorlikda barcha bo'g'indagi tibbiyot muassasalarida sohani ettita muhim yo'nalishlari bo'yicha, jumladan — birlamchi tibbiy yordam, tibbiy sug'urtani joriy etish va tizimni raqamlashtirish, shifoxonalarda tibbiy xizmat samaradorligini oshirish, farmasevtika va dori-darmonlar bilan ta'minlash, tibbiy asbob-uskunalar samaradorligini oshirish va shoshilinch tibbiy yordamni rivojlantirish ustida ishlamoqda.

Yangi tuzilmalarni tashkil etish
2024 yilda sog'liqni saqlash tizimida qator yangi tuzilmalar tashkil etildi, zamonaviy shifo maskanlari qurilib, foydalanishga topshirildi.
Xususan, sohada amalga oshirilayotgan islohotlarni chuqurlashtirish, aholiga ko'rsatilayotgan tibbiy xizmatlar sifatini tubdan yaxshilash maqsadida davlatimiz rahbarining 2024 yil 22 yanvardagi tegishli qaroriga muvofiq Sog'liqni saqlash vazirligi tuzilmasida "Sog'liqni saqlash loyihalari markazi" loyiha ofisi tashkil etildi.  
Unga davlat tibbiy sug'urtasi tizimini va davlat tomonidan kafolatlangan bepul tibbiy xizmatlar va dori vositalari paketini to'liq joriy etish, tibbiy xizmatlar sifati va xavfsizligi ustidan nazorat tizimini takomillashtirish hamda davlat xaridlari samarasi va shaffofligini oshirish, farmasevtika sohasini isloh qilish, sanitariya qoida va normalarini zamonaviy talablar asosida yangilash kabi vazifalar yuklatildi.
Bolalar onkologiyasi, gematologiyasi va immunologiyasi ilmiy-amaliy tibbiyot markaziga aylantirildi. Markaz huzurida onkologik va gematologik kasalliklarga chalingan bolalarni sog'lomlashtirishga ko'maklashish jamg'armasi tashkil etildi. nkologik va gematologik kasalliklarga chalingan bolalarni sog'lomlashtirishga ko'maklashish jamg'armasi ish boshladi. 
Muassasaning bolalar onkogematologiyasi, gematologiya, onkologiya, reanimasiya, gemodializ va plazmoferez bo'limlari, stasionar va maslahat poliklinikasi zamonaviy jihozlandi. 
Muassasaga eng so'nggi rusumdagi asbob-uskunalar keltirib o'rnatildi. Davolash va diagnostika standartlari yangilandi. Yana bir muhim jihati, molekulyar genetika, immunogistoximiya kabi murakkab laborator tekshiruvlar shu erning o'zida yo'lga qo'yildi.
Binobarin, shu yil Sog'liqni saqlash vazirligi elektron platformasining "vaziyatlar markazi" ochildi. Natijada sog'liqni saqlash sohasidagi barcha axborot tizimlarini yagona majmua orqali nazorat qilish mexanizmi yo'lga qo'yilmoqda. 
Markaz joylardagi axborot tizimlarining uzluksiz ishlashini ta'minlab, unda respublikadagi 1 700 dan ortiq tibbiyot muassasalarining ma'lumotlar bazasini Real vaqt rejimida ko'rish va tahlil qilish imkoniyati mavjud.  
Shu bilan birga, tibbiyot tashkilotlarini lisenziyalash va akkreditasiyalash markazi tashkil etildi.
Poytaxtimizda amalga oshirilgan navbatdagi Mega loyihalardan biri Respublika ixtisoslashtirilgan onkologiya va radiologiya ilmiy-amaliy tibbiyot markazining yangi Birlashgan kompleksi barpo etilishi bo'ldi. Bu erda Evropa va AQSh standartlari asosida 17 ta yangi klinik bo'lim, 18 ta jarrohlik xonasi, 42 ta reanimasiya va intensiv terapiya xonalari tashkil etildi. Ular jahon tibbiyotida qo'llanilayotgan eng so'nggi texnikalar bilan jihozlandi. Bunday zamonaviy texnikalarni ishlatish uchun yuzga yaqin mutaxassis 8 ta xorijiy davlatda malaka oshirib qaytdi. Yurtimiz bo'ylab 1 ming 200 nafar onkolog chet elda o'qitiladi.
 Jarrohlik bo'limida yiliga 6 mingta yuqori texnologik amaliyotlar o'tkazish imkoniyati bor. Jumladan, juda dolzarb bo'lgan suyak ko'migi transplantasiyasi yo'lga qo'yiladi. Yangi uskunalar yordamida ko'z, halqum va qizilo'ngach qismi o'smalarini kesmasdan olib tashlash mumkin. Qovuq o'smalari kam invaziv usulda bartaraf etiladi. Bularning samarasida bemorlar tezroq tuzalib, 3-5 kunda uyiga qaytishi mumkin.

Farmasevtika
Mamlakatimizda milliy farmasevtika sohasi jadal rivojlanmoqda. Bu esa nafaqat ichki bozorni sifatli va raqobatbardosh dori-darmonlar bilan ta'minlash, balki yurtimiz eksport salohiyatini yuksaltirishga ham xizmat qilyapti.
2025 yil uchun rejalar 
Kirib kelgan yilda tibbiyot tizimidagi transformasiya jarayoni butunlay yangi bosqichga ko'tarilishi kutilmoqda. Shu maqsadda davlatimiz tomonidan 2025 yilda sog'liqni saqlash sohasiga 41 trillion so'm mablag'ajratilishi ko'zda tutilgan. E'tiborli jihati, bu 2024 yildagiga nisbatan ancha ko'p kӯrsatkichdir.
Bundan tashqari, Qoraqalpog'iston Respublikasi, Navoiy, Samarqand, Buxoro, Xorazm va Qashqadaryo viloyatlarida davlat tibbiy sug'urtasi amaliyotlari joriy etiladi. 
"Xaridlar markazi" va uning 13 ta hududiy filiali tashkil etilib, tibbiy jihozlardan foydalanish elektron tizim orqali nazorat qilinadi. Yana 7 ta ixtisoslashtirilgan markaz va 2 ta oliy ta'lim muassasasi xalqaro akkreditasiyadan o'tkaziladi.
Yuqori texnologik jarrohlik yordami ko'rsatish sifatini yanada oshirish maqsadida ixtisoslashtirilgan tibbiyot markazlari tomonidan har bir viloyat bo'yicha 2 tadan tuman (shahar) namunaviy hamda ilg'or hududga aylantiriladi.
2025 yil sog'liqni saqlash tizimida mahalliy hokimliklar bilan hamkorlikda ishlash, o'z navbatida, sohaga investisiya kiritish masalalariga alohida e'tibor qaratiladi. 
Qisqa qilib aytganda, tibbiyotni, xususan, patronaj xizmatini xalqqa yanada yaqinlashtirish, kasalliklarning oldini olish, erta aniqlash va samarali davolash masalalari yangi yilda ham faoliyatimizning ustuvor mezoni bo'lib qoladi.