Respublika ixtisoslashtirilgan gematologiya ilmiy-amaliy tibbiyot markazida "gemodializ va gemotransfuziya olayotgan bemorlar orasida parenteral virusli gepatitlarni tashxislash va davolash"
2025-04-10 10:45:00 / Yangiliklar
Tadbir Sog'liqni saqlash vazirligi, virusologiya ilmiy-tadqiqot instituti, Respublika ixtisoslashtirilgan epidemiologiya, mikrobiologiya, yuqumli va parazitar kasalliklar ilmiy-amaliy tibbiyot markazi tomonidan tashkil etildi.
Unda gemodializ va gemotransfuziya muolajalarini olayotgan bemorlar orasida parenteral gepatitlarni erta aniqlash, davolash va tashxislash dasturini samarali amalga oshirish, mutaxassislar tayyorlash kabi masalalarga alohida e'tibor qaratilyapti.
Qayd etilganidek, O'zbekiston virusli gepatit bo'yicha endemik mamlakatlar toifasiga kiritilgan. 2018 yildan boshlab yurtimizda gepatit B va C skriningini tashkil etish va virusga qarshi terapiyadan foydalanish imkoniyatini ta'minlash bo'yicha tadqiqotlar o'tkazib kelinmoqda.
Xususan, 2022 yil 16 mayda qabul qilingan "ayrim dolzarb virusli infektsiyalar tarqalishiga qarshi kurashish chora-tadbirlarini takomillashtirish to'g'risida"gi Prezident qarori asosida 2030 yilgacha mamlakatimizda gepatitning C turini bartaraf etish va B turini kamaytirish ko'zda tutilgan. Bu JSST tomonidan belgilangan global maqsadlarga to'liq mosdir.
Seminarda ushbu xastalikni aniqlash va davolash bilan shug'ullanuvchi ixtisoslashtirilgan tibbiyot markazlari, yuqumli kasalliklar shifoxonalari mutaxassislari, tibbiyot oliy o'quv yurtlarining tegishli kafedralari xodimlari ishtirok etmoqda.
O'quv seminari yakunida qatnashchilarga tegishli setifikatlar topshirilishi rejalashtirilgan.
Sog'liqni saqlash vazirligi
Matbuot xizmati.