SSV: Yaponiya kompaniyasi bilan hamkorlikda yurtimizda qon xizmatini rivojlantirish bo'yicha seminar o'tkazildi
2025-02-13 15:35:00 / Yangiliklar
Unda vazir o'rinbosari F.Sharipov, Yaponiya xalqaro hamkorlik agentligi (JICA), ushbu davlatning mamlakatimizdagi elchixonasi, "Daido Industries Inc" kompaniyasi, Osaka tibbiyot va farmasevtika universiteti hamda boshqa hamkor tashkilot vakillari ishtirok etdi.
Tadbirda qayd etilganidek, 2019 yil O'zbekiston Sog'liqni saqlash vazirligi, Respublika qon quyish markazi va Yaponiyaning "Daido Industries Inc" kompaniyasi rahbarlari o'rtasida Јіsaning 1 mln. AQSh dollari miqdoridagi grant mablag'ini ajratish bo'yicha kelishuvga erishilgan edi.
Bu orqali yurtimizda qon bilan ishlash xizmati muassasalari faoliyatini takomillashtirish, Respublika qon quyish va Respublika ixtisoslashtirilgan gematologiya ilmiy-amaliy tibbiyot markazlarini zamonaviy uskunalar bilan jihozlash hamda soha xodimlari malakasini oshirish ko'zda tutilgan.
Shuningdek, 2022 yil o'zbekistonlik bir guruh mutaxassislar kunchiqar yurtning Kioto shahrida joylashgan "Daido Industries Inc" kompaniyasi ofisi va bir nechta gospitallarda bo'lib, mazkur kompaniya tomonidan ishlab chiqarilgan jihozlar (muzlatkich, sovitkich, trombomikser inkubator)lardan amaliyotda foydalanish jarayonlari bilan yaqindan tanishib qaytdi.
Qolaversa, o'tgan yili JICA granti asosida mamlakatimizda "qon xizmati sifatini boshqarish tizimini mustahkamlash" loyihasi amalga oshirildi.
Uning doirasida Respublika qon quyish markazi va Respublika ixtisoslashtirilgan gematologiya ilmiy-amaliy tibbiyot markazi klinikasi muzlatkich, sovitkich, trombomikser inkubator kabi eng ilg'or uskunalar bilan jihozlanib, mas'ul xodimlar o'qitildi.
Aytish lozimki, mazkur jihozlar eritrosit massasi, trombositlar hamda plazmani saqlashga mo'ljallangan bo'lib, xalqaro standartlarga to'la mos keladi.
Tadbirda shu haqda so'z yuritilar ekan, o'zaro hamkorlikdagi bu kabi loyihalar yurtimizda qon xizmatini yanada rivojlantirishga xizmat qilishi alohida qayd etildi.
Seminarda yaponiyalik ekspertlar o'z ma'ruzalari bilan qatnashdi. Unda mamlakatimizdagi ilmiy-amaliy tibbiyot markazlari va klinikalarining gemotransfuziya amaliyoti bilan shug'ullanuvchi mutaxassislari, qon bilan ishlash xizmati muassasalari mas'ullari ishtirok etdi.
Sog'liqni saqlash vazirligi
Matbuot xizmati.