O‘zbеkistоn Rеspublikаsi Sоg‘liqni saqlash vаzirligi

Davlat byudjeti mablag'lari hisobidan qoplanadigan tibbiy yordamning kafolatlangan hajmi belgilanganligi to'g'risida Sog'liqni saqlash vazirligining tegishli buyrug'i imzolandi.

Ma'lumki, bugun yurtimizda tibbiy xizmatlar sifati va qamrovini kengaytirishga qaratilgan kompleks chora-tadbirlar amalga oshirilyapti.

 Xususan, tibbiyotning birlamchi bo'g'inini mutlaqo yangicha yondashuvlar asosida transformasiya qilish, uni kasalliklarni erta aniqlaydigan va davolaydigan tizimga aylantirish borasida salmoqli ishlar qilinmoqda. Buning uchun davlatimiz tomonidan katta mablag'va imkoniyat safarbar etilyapti.

 — Sir emas, avvallari birlamchi tibbiy-sanitariya muassasalarida oilaviy shifokor qabuliga kelgan aksariyat fuqarolarga dori-darmonlar resepti yozib berilar, bu holat surunkali kasalligi bor va shoshilinch tibbiy yordamga muhtoj bemorlarga, moddiy imkoniyati cheklangan oilalarga qiyinchilik tug'dirardi, — deydi vazirlikning tibbiy yordamni tashkil qilish departamenti boshlig'i o'rinbosari Sunnat Safarov.

 — E'tiborlisi, Sog'liqni saqlash vazirligining tegishli buyrug'iga muvofiq, oilaviy shifokor punktlari, oilaviy poliklinikalar, ko'p tarmoqli Markaziy poliklinikalar, tuman (shahar) Markaziy shifoxonalarida va tug'uruqxonalarda ko'rsatiladigan tibbiy yordamning kafolatlangan hajmlari ro'yxati belgilandi.

Jumladan:

 sog'liqni saqlash muassasalarida ko'rsatiladigan tibbiy yordamning kafolatlangan hajmlari (vena ichiga, mushak orasiga, teri ostiga in'ektsiyalar qilish, oilaviy shifokor punktida tashkil qilingan kunduzgi stasionarda tibbiy yordam ko'rsatish, bolalarni boshqariluvchi infektsiyalarga qarshi emlash, Sog'liqni saqlash vazirligining tegishli buyruqlariga muvofiq aholini profilaktik ko'riklar va skrining tekshiruvlaridan o'tkazish, surunkali kasalliklari bor aholini muntazam kuzatuvini amalga oshirish);

 tibbiyot muassasalarida ko'rsatiladigan tibbiy yordamning kafolatlangan hajmlariga kiritilgan tashxislar (masalan, yurakning gipertenziv kasalligi, yurak surunkali ishemik xastaligi, o'tkir va surunkali bronxit, surunkali gepatitlar, diffuz buqoq, bronxial astma, atopik astma, o't-tosh kasalligi, epilepsiya bo'yicha maqsadli davolash);

 dori vositalari va tibbiy buyumlar (masalan, analeptiklar, allergiya, qandli diabet, gijja va viruslarga qarshi hamda yurak−qon tomir dori vositalari, antibiotiklar, antidepressantlar, tibbiy bintlar, infuzion sistemalar bilan uzluksiz ta'minlash) kabi qator tibbiy yordamning kafolatlangan hajmlari nazarda tutilgan.

Ushbu ro'yxatga muvofiq jami 520 ta tashxis, 28 ta diagnostik tekshiruv, 46 ta laborator tahlil, 235 turdagi dori vositalari, 27 ta operativ davo hamda 76 ta tibbiy buyumlar bemorlarga davlat hisobidan bepul taqdim etiladi. Dori vositalari tibbiy ko'rsatmalarga asosan oilaviy shifokorlar tomonidan beriladigan resept hamda tor soha mutaxassislarining tavsiyasiga ko'ra, belgilangan hajmda beriladi.

Mazkur xizmat turlari, dori vositalari va sarflov materiallari oilaviy shifokor punktlari, oilaviy poliklinikalar, ko'p tarmoqli Markaziy poliklinikalar, tuman (shahar) Markaziy shifoxonalari va tug'uruqxonalarda shakllantirilgan kasalliklar ro'yxatiga ko'ra, tasdiqlangan klinik protokol va davolash-diagnostika standartlari asosida shakllantirilgan.

Ushbu hujjat joriy yilning 17 oktyabridan kuchga kirgan.

Sog'liqni saqlash vazirligi
Matbuot xizmati.