Poytaxtimizda allergolog-klinik immunologlarning IV ilmiy-amaliy Kongressi ish boshladi
2024-10-22 09:55:00 / Yangiliklar
Poytaxtimizda allergolog-klinik immunologlarning IV ilmiy-amaliy Kongressi ish boshladi. Tadbirda yurtimiz hamda Rossiya, Germaniya, Avstriya, Turkiya, Ukraina, Gruziya, Qozog'iston kabi qator xorijiy mamlakatlar olimlari va ekspertlar ishtirok etmoqda.
Anjumanda qayd etilganidek, bugungi kunda dunyo aholisining 30-40 foizi allergik kasalliklardan aziyat chekmoqda. Taraqqiy etgan davlatlarda har uch odamdan biri allergik rinit, har o'n kishidan biri bronxial astmaga chalingan.
Bularning bari ushbu kasallikka tashxis qo'yish, davolash hamda profilaktika qilish bo'yicha ilg'or tajribalarni amaliyotga tatbiq etishni taqozo etadi.
Respublika ixtisoslashtirilgan allergologiya va klinik immunologiya ilmiy-amaliy tibbiyot markazi tomonidan o'tkazilayotgan Kongressda shu kabi masalalar yuzasidan fikr hamda tajriba almashilmoqda.