Saudiya matbuoti: O‘zbekiston bilan yirik investitsiyaviy hamda tibbiy loyihalar imzolandi
2026-08-03 12:10:00 / Yangiliklar
“Dawaa News” portalining yozishicha, Saudiya Arabistoni sog‘liqni saqlash vaziri Fahd bin Abdurahmon al-Jalajil 27-iyul kuni Toshkentga tashrif buyurgan. U safar davomida “Sexa” virtual shifoxonasi, Saudiya Arabistoni Milliy tibbiy sug‘urta markazi, “Lean Business Services” kompaniyasi va Saudiya tibbiyot mutaxassisliklari bo‘yicha komissiyasi bilan oltita hujjatdan iborat to‘plamni imzolagan.
O‘zbekiston Bosh vaziri o‘rinbosari Jamshid Xodjayev bilan bo‘lib o‘tgan uchrashuvda sog‘liqni saqlashdan tashqari boshqa sohalarda umumiy qiymati 24,8 milliard dollarlik 48 ta loyihadan iborat qo‘shma investitsiya portfeli shakllantirilgan.
Nashrda Jahon banki guruhiga kiruvchi Xalqaro moliya korporatsiyasi ko‘magida Saudiya Arabistonining “Vision Invest” kompaniyasi ishtirokida davlat-xususiy sheriklik asosida amalga oshirilayotgan, qiymati qariyb 300 million AQSH dollariga teng Farg‘ona viloyatidagi 800 o‘rinli ko‘p tarmoqli shifoxona qurilishiga alohida e’tibor qaratilgan. Bu ikki mamlakatning sog‘liqni saqlash sohasidagi eng yirik qo‘shma loyihasi hisoblanadi.
“Ar Riyadh” gazetasi esa Prezident Shavkat Mirziyoyev 28-iyul kuni Saudiya delegatsiyasini qabul qilgani, uchrashuvda tomonlar sog‘liqni saqlash tizimini modernizatsiya qilish, farmatsevtika va klinikalar qurilishi masalalarini muhokama qilib, yangi loyihalar bo‘yicha “yo‘l xaritasi”ni ishlab chiqishga kelishib olgani haqida yozdi.