SSV: Farg'onada 800 o'rinli zamonaviy ko'p tarmoqli shifoxona qurish bo'yicha bitim imzolandi
2026-04-15 18:00:00 / Yangiliklar
Uch tomonlama tuzilgan ushbu bitim Sog'liqni saqlash vaziri Asilbek Xudayarov, "Vision International Investment Company" prezidenti va bosh ijrochi direktori Omar Al-Midani, "КОС Сonstruction Mekanik Elektrik Fe LLC" kompaniyasi bosh direktori Subutay Gyuzel tomonidan imzolandi.
Shunga bag'ishlab o'tkazilgan tadbirda Germaniyaning O'zbekistondagi elchixonasi missiyasi rahbari o'rinbosari Marion Edel ham ishtirok etdi.
Ta'kidlanganidek, mazkur davlat-xususiy sheriklik loyihasi Prezidentimizning "O'zbekiston Respublikasida 2024-2030 yillarda davlat-xususiy sheriklikni rivojlantirish chora-tadbirlari to'g'risida"gi qaroriga muvofiq va Sog'liqni saqlash vazirligi tashabbusi bilan amalga oshirilmoqda. U Markaziy Osiyoda DXSH modeli asosida amalga oshirilayotgan eng yirik sog'liqni saqlash ob'ektiga aylanishi kutilyapti.
Loyihaning umumiy investisiyaviy qiymati qariyb 300 million AQSh dollarini, qurilish muddati esa 36 oyni tashkil etadi.
Yangi tibbiyot majmuasi Farg'ona viloyatidagi beshta mavjud ixtisoslashtirilgan muassasani yagona kompleksga birlashtiradi. Mintaqa va unga tutash viloyatlar aholisiga kardiojarrohlik, neyrojarrohlik, organlar transplantasiyasi, nefrologiya hamda ortopediya yo'nalishlarida uchinchi darajali yuqori texnologik tibbiy xizmatlardan foydalanish imkoniyatini yaratadi.
Shuningdek, majmua tarkibida 160 o'rinli intensiv terapiya va shoshilinch tibbiy yordam bo'limlari hamda barcha yordamchi klinik xizmatlar bo'lishi ko'zda tutilgan.
Xususiy sherik — "Vision International Investment Company" (Saudiya Arabistoni) va "КОС Construction Mekanik Elektrik Fe LLC" (O'zbekiston) kompaniyalaridan iborat konsortsium — loyihaning to'liq tsikli uchun mas'ul bo'ladi.
Loyiha tuzilmasi xalqaro moliya korporasiyasi (IFC, Jahon banki guruhi)ning strategik ko'magida hamda Germaniyaning iqtisodiy hamkorlik va taraqqiyot federal vazirligi (BMZ) moliyaviy qo'llab-quvvatlashi bilan ishlab chiqilgan.
Shifoxonaning ilg'or diagnostika va davolash infratuzilmasi bilan jihozlanishi resurslardan foydalanish samaradorligini oshirib, xizmat ko'rsatish sifatini yaxshilaydi va bemorlarning davolanish uchun boshqa xorijiy davlatlarga borishiga hojat qoldirmaydi.
Yangi loyiha davlat va xususiy sektorning sog'liqni saqlash sohasidagi muvaffaqiyatli hamkorligining pilot namunasi sifatida e'tirof etilmoqda.
Sog'liqni saqlash vazirligi
Matbuot xizmati.