O‘zbеkistоn Rеspublikаsi Sоg‘liqni saqlash vаzirligi

Tadbirda Prezident Administrasiyasi mas'ullari, vazir o'rinbosarlari, "Sog'liqni saqlash loyihalari markazi" loyiha ofisi hamda vazirlikning tegishli boshqarma boshliqlari ishtirok etdi. 

Joylardagi studiyalardan barcha hududiy boshqarmalar, tuman (shahar) tibbiyot birlashmalari, tajriba-sinov loyihasi amalga oshirilayotgan hududlarga biriktirilgan ixtisoslashtirilgan markazlar, respublika tasarrufidagi shifoxonalar mas'ullari ulandi. 

Kun tartibidagi birinchi masala 13 mart kuni Prezidentimiz raisligida aholi murojaatlari bilan ishlash tizimini takomillashtirish va jamoatchilik fikrini chuqur tahlil qilish masalalari yuzasidan o'tkazilgan videoselektor yig'ilishida berilgan topshiriqlar ijrosiga bag'ishlandi.

Qayd etilganidek, o'tgan yil davomida vazirlik hamda uning tizimidagi tashkilotlarga jismoniy va yuridik shaxslardan jami 88 414 ta murojaat kelib tushgan. Ularning 67 foizi qanoatlantirilgan, 32 foizi bo'yicha tegishli tushuntirishlar berilgan, 445 tasi rad etilgan. 

Eng ko'p murojaatlar davolash ishlarini tashkil etish (24 foiz), tibbiy-mehnat ekspertizasi va nogironlikni belgilash (14 foiz), sog'liqni saqlash xodimlarining xatti-harakatlari bo'yicha (13 foiz), tibbiyot uskunalari va dori-darmon bilan ta'minlash (7 foiz) masalalariga to'g'ri kelgan.

Surxondaryo, Qashqadaryo, Farg'ona, Namangan viloyatlari sog'liqni saqlash boshqarmalari hamda Qamashi, Davlatobod, Oltiariq, Yozyovon, Sherobod, Qo'ng'irot tuman tibbiyot birlashmalarida murojaatlarni ko'rib chiqish muddatiga amal qilinmagan.

Shuningdek, ayrim tuman va shaharlarda murojaatlar soni avvalgi yillarga nisbatan sezilarli darajada ortgan. Xususan, Denov, Yashnobod, Dehqonobod, Yunusobod, Olmazor tumanlari, Namangan, Farg'ona, Samarqand, Chirchiq shaharlari bu ro'yxatda etakchi o'rinlarda qayd etilgan. 

Shundan kelib chiqqan holda vazir boshchiligida mazkur hududlarda murojaatchilar bilan sayyor qabullar o'tkazish belgilandi. 

O'z navbatida, davlatimiz rahbari topshirig'i asosida sohada bo'layotgan e'tirozlarni kamaytirish bo'yicha "yo'l xaritasi" tasdiqlanib, belgilangan chora-tadbirlar bo'yicha brifing tashkil etilishi ma'lum qilindi. 

"Endi hech bir murojaat e'tibordan chetda qolmaydi, — dedi vazir. — Bu borada sustkashlikka yo'l qo'ygan mas'ullar qat'iy jazolanadi. Har chorakda olingan tahlillar asosida ularni keltirib chiqaruvchi omillar o'rganiladi va echimini ta'minlash bo'yicha zarur choralar ko'riladi. 

Yig'ilish kun tartibidagi ikkinchi masala — tajriba-sinov loyihasi amalga oshirilayotgan hududlarda sog'liqni saqlashning yangi modelini joriy etish jarayonida aniqlangan kamchiliklar yuzasidan "Sog'liqni saqlash loyihalari markazi" loyiha ofisi rahbari Eldor Adilovning hisoboti tinglandi. 

Har ikki masala yuzasidan sustkashlik va mas'uliyatsizlikka yo'l qo'ygan tegishli rahbarlarga nisbatan intizomiy jazo chorasi qo'llanilishi ma'lum qilindi. 

O'z navbatida, ijtimoiy reestrda turgan ehtiyojmand bemorlarni "vaqf" xayriya jamoat fondi hamda "Saxovat va ko'mak" jamg'armasi tomonidan ajratilgan mablag'lar hisobidan salomatligini tiklash, ularda murakkab jarrohlik amaliyotlarini o'tkazish holati tahlil qilindi. 

Yakunda kun tartibidagi masalalar yuzasidan mas'ullarga tezkor va aniq topshiriqlar berildi. 

Sog'liqni saqlash vazirligi
Matbuot xizmati.